DILI, STLTIMORLESTE.com – Ministra Edukasaun (ME), Dulce de Jesus Soares hamutuk ho Primeiru Ministru (PM), Kay Rala Xanana Gusmão halao lansamentu farda nasional estudantes edukasaun pre eskolar, ensinu baziku, sekundariu no tekvo.
Serimonia lansamentu uniforme eskolar nee halao iha salaun Ian Martin Balide, Dili, Sesta ohin (20/12/2024).
“Ohin iha farda oin haat, iha farda matak ho mutin ba estudantes edukasaun pre eskolar, depois kor mutin, coklat naroman nee ba ensinu baziku, husi primeiru siklu too terseiru siklu, depois iha farda azul eskuru ho mutin ba ensinu sekundariu jeral, depois farda metan ho mutin nafatin nee ba ensinu sekundariu tekniku vokasional. Ita lakohi farda barak liu tanba ida nee sei fo impaktu ekonomiku ba inan aman sira, neebe mak sira nian kbiit la too, semana ida sira tenke sosa farda oin tolu ba sira nia oan sira, la presiza loron haat ka lima hatais farda, iha loron ida ka rua mak livre, atu fo tempu ba inan aman sira fase, atu nunee ita hakarak evita ba ema hotu iha osan atu sosa farda, ita koko iha momentu ita halo farda nee ita mos halo konsultasaun no haree, ita kompriende ita nia inan aman sira barak mak sei enfrenta problema ida nee,” dehan ME, Dulce.
Nia dehan, se pre eskolar sira iha segundu anu nian sira iha farda ona, mantein deit farda ida nee, tanba sira uza tinan ida deit sira sai ona, fo importansia ba sira neebe tama iha ensinu baziku primeiru anu, setimu anu, ensinu sekundariu desimu anu, pre eskolar grupu A.
(jac)
