DILI, STLTIMORLESTE.com – Liu husi Komunikadu neebe STL asesu husi media F-FDTL nian katak, Vise Xefe Estadu Maior Jenerál FALINTIL-Forsa Defeza Timor Leste (F-FDTL), Major Jenerál Calisto Santos “Coliati” ohin simu membru F-FDTL nain rua, kompostu husi Major Edi Fernando Viana no Major José Rodrigues da Cruz, neebe termina ona sira nia misaun apoiu paz durante tinan ida iha South Sudan.
Nia dehan, iha sorumutu nee,.Vise Xefe Estadu Maior Jenerál FALINTIL-Forsa Defeza Timor Leste (F-FDTL), Major Jenerál Calisto Santos “Coliati” hatoo parabens no bem-vindu ba membru nain rua nee, tanba sira konsege termina misaun ho diak no susesu iha South Sudan.
“Hau reprezenta Komando nia naran hakarak hatoo hau nia parabens ba ita boot sira nain rua, tanba kumpri ona misaun ho diak no susesu. Ohin loron, imi fila -fali mai Timor-Leste ho kondisaun diak, neebe sai orgullu ba Instituisaun no Nasaun,”nia esplika.
Nia Informa, misaun apoiu paz nee reflete kompromisu F-FDTL atu kontribui ba estabilidade no manutensaun paz iha nivel internasional, liu hosi partisipasaun iha operasaun sira neebe promove seguransa no dame iha Nasaun sira neebe presiza apoiu komunidade internasional.
(jen)
