DILI, STLTIMORLESTE.com – Deskonfia Membru Polisia Nasional Timor Leste (PNTL) ho naran Engracia Purificação nuudar Ajente Prinsipal neebe halao knaar Unidade Espesial Polisia, neebe tiru aan iha nia rezidensia area Matadoru Dili, iha tuku 09:30 OTL, no daudaun sei iha prosesu investigasaun nia laran.
“Ami Portavoz hatoo informasaun balun neebe liga ba insidente grave ida neebe akontese iha horikalan ba Membru PNTL feto ida deskonfia tiru aan,” hatete Porta-voz Polisia Nasional Timor Leste (PNTL) Superintendente Polisia, João Belo Dos Reis ba jornalista sira liu husi Konferensia Imprensa iha KomJer Dili, Kinta (25/06/2026).
Nia tenik, Sentru Operasaun Polisia Timor Leste simu informasaun katak, iha akontesimentu tiru aan ida neebe kontese iha parte Matadoru nunee Ekipa husu Patrollamentu nian hakat kedas ba fatin akontesimentu, depois halo kordenasaun ho familia lori kedas vitima ba Hospital Nasional Guido Valadares (HNGV ) hodi tenta salva Membru nee nia vida maibe lakonsege tanba raan sai barak.
“Ita nia Membru sira lori kedas ba HNGV no Pesoal Saúde sira iha HNGV halo esforsu hotu-hotu, maibe labele salva nia vida tanba lakon raan barak, no kilat musan neebe mak kona nia ulun rezulta ninia ulun hetan grave,” nia esplika.
Nia deklara, daudaun nee Polisia Nasional Timor Leste (PNTL) luu husi Ekipa Forensik nomos ekipa sala Mortuariu nian hein hela prosesu Autopsia hodi bele aprezenta mos ba Tribunal Dili.
Nia koalia, haree Ekipa Forensik halo nia servisu, Forensik laboratoriu mos halo nia servisu hein katak sei bele finaliza iha tempu hirak oin mai
“Hodi naran KomJer nian ami hatoo mos sintidu kondolensia profunda ba familia en lutada no nia kolega servisu, tanba ami lakon ami nia Anjente Prinsipal neebe diak teb-tebes no durante nee dedika aan tomak ba servisu profisional PNTL nian,” nia informa.
Protavoz nee apela nafatin ba familia Matebian atu iha koordenasaun diak ho PNTL para prosesu investigasaun, karik buat ruma neebe PNTL persiza tan rekolha.
Nia hatutan, prosesu investigasaun sei lao hela, tanba nee fatin akontesimentu no kilat daudaun nee asegura ona husi Ekipa Forensik nian, neebe dadaus hotu-hotu hanesan evidensia ida ba PNTL atu aprezenta ba Ministeriu Publiku.
“Ami rekolha hotu ona privasi sira neebe mak ita persiza hodi bele ba iha prosesu Investigasaun, no karik hetan ona karta bele hahu ona autopsia ohin ou aban,” nia koalia.
Iha fatin hanesan, Xefe Mortuariu Hospital Nasional Guido Valadares (HNGV), Nilton Tilman esplika, mate isin daudaun nee iha sala mortuariu deside hodi kalan kedas, ohin dadersan seidauk bele autopsia tanba karta pedidu husi Forensik.
“Maibe agora loraik nee hahu Autopsia ona no ita sei entrega kedas ba familia no Instituisaun PNTL,” nia afirma.
(jen)
