DILI, STLTIMORLESTE.com – Ministeriu Ensinu Superior Siensia no Kultura (MESSK) halao abertura formasaun lingua Português 2025 ba dosente Ensinu Superior, no entrega sertifikadu ba formasaun tinan 2024.
“Importansia husi abertura formasaun nee, Ministeriu kontinua fo formasaun lingua português ba profesores husi ensinu superior privadu sira, no iha 2024 ita konsege fo formasaun ba 194 profesores neebe ohin sira simu ona sertifikadu, ita boot sira rona diskursu ohin ho lian português importante tebes ba TL, liu-liu ita fo motivasaun ba ita nian joven sira atu kontinua aprende lian português,” dehan Ministru Ensinu Superior Siensia no Kultura (MESSK), Jose Honorio da Costa Pereira Jeronimo ba jornalista sira iha salaun Ian Martin, Balide, Dili, Kinta nee (20/02/2025).
Nia dehan, lei baze de ensinu superior mos aprova no promulga ona husi Prezidente Republika, tanba nee hanesan Ministru husu ba ensinu superior sira atu kontinua hanorin ho lian português no tetum, nee importante tebes ba TL, atu nunee bele forma joven sira, formasaun ida nee haree husi partisipasaun agora diak tebes-tebes, husi ensinu superior haruka sira nian dosente.
Iha fatin hanesan, reprezentante formandu UCT, José Agustu da Silva dehan, formasaun ida nee atu kontribui ba konsolidasaun sistema edukasaun Timoroan nian. Hametin abilidade komunikativu tekniku sientifiku, didatiku pedagojiku no linguistiku, liu husi kursu formasaun ba formador, ho hanoin atu fo formasaun ba profisional kualifikadu sira hodi hanorin kursu lian português ba estudante sira iha nivel ensinu hotu-hotu.
(jac)
