DILI, STLTIMORLESTE.com – Ministeriu Ensinu Superior, Siensia no Kultura (MESSK) kontinua haforsa relasaun no kooperasaun ho ASEAN University Network, hodi hasae kualidade ensinu superior, dezenvolve kapasidade rekursu umanu no promove investigasaun no inovasaun ba dezenvolvimentu sustentavel.
Iha loron 23 too 24 Julhu 2026, MESSK liu-husi Diretor Jeral Ensinu Superior no Siensia, Domingos Barros partisipa enkontru rejional ASEAN University Network neebe realiza iha Singapore.
Liu husi komunikadu neebe STL asesu husi media MSSK, Sesta nee (24/07/2026) hatete, iha enkontru nee foka ba tema estratejiku “student centered leadership and governance, digital transformation, artificial intelligen (AI) and future skills, inclusive well-being, no research equity” ho objetivu atu hametin kooperasaun no promove inovasaun iha area ensinu superior iha rejiaun ASEAN.
Iha enkontru ne’e Sekretariadu AUN Thailandia mos hatoo informasaun ba membru AUN sira kona-ba prosesu integrasaun Timor-Leste no husu ba membru sira atu fo apoiu ba Timor-Leste atu bele asesu no sai membru iha AUN Charter durante tinan 2027, nuudar parte husi esforsu atu hametin partisipasaun TL iha rede kooperasaun ensinu superior iha ASEAN.
“Partisipasaun MESSK iha enkontru nee reflete kompromisu Governu TL atu kontinua haforsa relasaun no kooperasaun ho AUN, hodi hasae qualidade ensinu superior, dezenvolve kapasidade rekursu umanu, no promove investigasaun no inovasaun ba dezenvolvimentu sustentavel,” sita komunikadu nee.
(dom)
