DILI, STLTIMORLESTE.com – Ministeriu Ensinu Superior, Siensia no Kultura (MESSK) liu-husi Diresaun Nasional Kurrikulu Ensinu Superior (DNKES), realiza formasaun kapasitasaun ba funsionariu no tekniku sira MESSK kona-ba dezenvolvimentu kurríkulu, implementasaun sistema kualifikasaun nasional, korpu konhesimentu no aplikasaun dekretu lei kurríkulu padraun nasional.
Atividade nee realiza durante loron lima, hahu husi 15 too 19 Juñu 2026, iha Salaun Institutu São João de Brito (ISJB), Kasait, Tibar, Munisípiu Likisa.
Liu husi pajina offisial MESSK neebe STL asesu Tersa (23/06/2026) hatete, formasaun ida nee hanesan parte husi esforsu MESSK atu reforsa kapasidade institusional no dezenvolve rekursu umanu neebe kualifikadu, hodi garante prosesu planeamentu, dezenvolvimentu, implementasaun no avaliasaun kurríkulu iha instituisaun ensinu superiór sira tuir padraun nasional.
Iha formasaun nee, partisipante sira hetan konesimentu klean kona-ba estrutura no mekanizmu Sistema Nasional Kualifikasaun (SNK), elaborasaun Korpu Konesimentu (KK), no oinsa integra prinsipiu Kurríkulu Padraun Nasional (KPN) ba programa akademiku sira atu responde ba nesesidade dezenvolvimentu nasional no merkadu trabalhu.
Tuir pajina nee katak, objetivu prinsipal husi formasaun ida nee mak hasae kapasidade no kompetensia funsionariu no tekniku sira MESSK iha area dezenvolvimentu no jestaun kurríkulu. Hametin kompreensaun kona-ba Sistema Nasional Kualifikasaun (SNK), Korpu Konesimentu (KK) no Kurríkulu Padraun Nasional (KPN). Dezenvolve no avalia kurríkulu bazeadu ba kompetensia, tuir padraun nasional no referensia internasional. Garante alinamentu entre programa estudu sira ho nesesidade setor profisional no prioridade dezenvolvimentu Timor-Leste. Hasae kualidade ensinu superior liu-husi implementasaun kurríkulu neebe relevante, inkluzivu no orientadu ba rezultadu aprendizajen.
Liu husi inisiativa ida nee, MESSK reafirma nia komitmentu atu kontinua hametin sistema ensinu superior iha TL, liu husi dezenvolvimentu kapasidade rekursu umanu no implementasaun politika edukativa neebe garante kualidade, relevansia no sustentabilidade iha setor ensinu superior nasional.
(dom)
