DILI, STLTIMORLESTE.com – Ministeriu Ensinu Superior, Siensia no Kultura (MESSK) liu husi Diretor Jeral ba Planeamentu no Finansas (DGPF), Trinito Sarmento konvida dirijente no funsionariu sira hotu atu kontinua hametin disiplina no responsabilidade hodi halao servisu neebe diak ba povu.
Liafuan nee Diretor Jeral ba Planeamentu no Finansas, Trinito Sarmento haktuir liu husi serimonia hasae bandeira Republika Demokratika Timor Leste (RDTL) iha edifisiu MESSK Kolmera, Segunda (03/08/2026).
Nia hatete, serimonia isar bandeira nee nuudar parte ida husi komitmentu atu hametin patriotizmu, nasionalizmu no respeitu ba simbolu estadu.
“Iha okaziaun nee Diretor konvida dirijente no funsionariu sira hotu atu kontinua hametin disiplina no responsabilidade iha knaar hanesan funsionariu publiku hodi fo servisu neebe diak ba povu no dezenvolvimentu setor Ensinu Superior, Siensia no Kultura iha Timor Leste,” dehan nia liu husi pajina media MESSK.
Atividade nee rasik organiza husi DGPF hamutuk ho Unidade Relasaun Publiku (URP), MESSK ho apoiu husi estudante Institutu Superior Cristal (ISC).
Iha sorin seluk Visi Diretor Eekola Colegio Sao Jose Operario, Anacleto da Costa liu husi serimonia isar bandeira husu ba professor sira husi eskola ida nee atu kada fulan iha primeira semana tenke hasae no hatun bandeira RDTL, tanba ida nee mak nudar parte ida atu hametin patriotismu, nasionalismu no respeitu ba simbolu estadu.
Nia hatutan, husu ba manorin no alunus sira atu disiplina ba tempu hodi hader sedu no prepara aan ba iha oras eskola nian. Labele toman tarde nomos tenke disiplina iha sala laran. Tuir fali mak tenke responsabilidade ba knar neebe mak iha hatudu iha uma laran, iha eskola, sosieadade no ba nasaun. Ida nee nudar futuru naroman atu hakat pasu ba oin.
Entretantu Estudante ICS, Mariana Soares hatete, serimonia isar bandeira nee atu hametin valor patriotismu, nasionalismu no sai sidadaun neee fo kontribuisaun ba desenvolvimentu nasaun. Liu husi isar bandeira nee mos atu fo hanoin fali ba Timoroan sira, hodi hanoin fila fali katak bandeira nee lori Timoroan barak nia isin no ran mak hola no hetan.
(dom)
