DILI, STLTIMORLESTE.com – Governu liu husi Ministeriu Ensinu Superior Siensia no Kultura (MESSK) seidauk iha hanoin halo dormitoriu ba ema barak, maibe apela ba sira neebe eskola hotu ona sai no fo fatin ba estudante foun.
Haktuir Ministru Ensinu Superior Siensia no Kultura (MESSK), Jose Honorio da Costa Pereira Jeronimo ba jornalista sira iha salaun Ian Martin, Balide, Dili, Kinta nee (20/02/2025).
“Kona-ba dormitoriu estudante iha Hera, nee UNTL mak tenke haree, maibe hau nian apelu mak nee, sira neebe remata ona estudu, labele hela iha neeba, maibe oinsa fo fatin ba ita nian estudantes foun atu ba hela, tanba dormitoriu nee ba estudante sira, agora seidauk hanoin halo dormitoriu ba ema barak, nee seidauk, maibe ita hanoin ba futuru,” nia esplika.
Ministru Jose hatutan, loos duni Deputadu sira foti kestaun nee, maibe sira sei fo resposta ofisial katak, tinan ida nee Governu seidauk hanoin ba dormitoriu Hera nee, dala ida tan sira neebe eskola remata ona sai para bele fo fatin ba sira seluk.
Iha parte seluk, Deputadu husi Bankada CNRT, Jose Virgilio antes nee hatete, oinsa Ministeriu Ensinu Superior halo dormitoriu ba estudantes sira iha Hera, tanba fatin ida deit sira nain hitu ou ualu mak toba hamutuk, husu ba MESSK hodi haree asuntu nee, bele iha planu tau orsamentu halo dormitoriu ba estudante sira.
(jac)
