DILI, STLTIMORLESTE.com – MG Padaria hahu negósiu iha 2019 ho kapital US$ 75, no agora emprega traballadór na’in haat iha Delta no Bidau.
Diretór MG Padaria, Duarte da Costa Tilman, hatete katak nia hahú negósiu fa’an paun no dosi iha uma, uza osan ne’ebé hetan husi servisu iha kompanhia balu durante semana rua.
Nia esplika katak, iha inísiu negósiu, ekipamentu limitadu obriga traballadór sira servisu oras adisionál, maibé produsaun ne’ebé hetan seidauk sufisiente.
Duarte hatete katak, nia jere prosesu negósiu tomak, hahú husi preparasaun matéria-prima, produsaun, to’o fa’an no distribui produtu ba merkadu.
Nia afirma katak, limitasaun ekipamentu impede padaria atende demanda konsumidór sira no difikulta kompetisaun ho empreza seluk ne’ebé iha kapital no ekipamentu boot.
“Limitasaun ekipamentu halo ami labele atende demanda merkadu ho di’ak. Kompetidór sira iha kapital no ekipamentu boot, ne’ebé difikulta ami atu kompete,” dehan Duarte ba STL iha Delta, Segunda (12/10/2026).
Nia hatete katak, atu supera limitasaun kapital, nia asesu ba programa kréditu suave Governu VIII liuhusi MTCI, ne’ebé fasilita asesu ba finansiamentu.
Duarte afirma katak, kréditu suave ne’e ajuda nia sosa ekipamentu produsaun ne’ebé sufisiente atu aumenta kapasidade no atende demanda merkadu.
Nia rekomenda ba Governu atu kontinua apoia emprezáriu ki’ik sira, liuliu iha asesu ba ekipamentu produsaun no formasaun profisionál.
Nia konsidera katak, atu loke filiais foun iha munisípiu sira, emprezáriu presiza aumenta ekipamentu no kapasita traballadór sira iha produsaun, marketing, jestaun finanseira no integridade.
Kona-ba rendimentu, Duarte relata katak MG Padaria hetan lukru brutu loroloron US$80, antes hasai kustu traballadór, operasionál no matéria-prima.
“Husi lukru brutu ne’e, ami tenke selu kustu traballadór, inklui ami rasik, kustu operasionál no matéria-prima,” dehan nia.
Duarte mós hatete katak, aumentu folin sasán, liuliu mina, aumenta kustu operasionál no afeta sustentabilidade negósiu kompara ho períodu anterior.
Maski hasoru aumentu kustu, nia afirma katak MG Padaria kontinua buka dalan atu mantein produsaun no kompete iha merkadu.
(dom)
