DILI, STLTIMORLESTE.com — Ministériu Interior (MI) kontinua implementa regra viza ba sidadaun estranjeiru, ho objetivu atu kontrola prazu hela no prevene violasaun viza, inklui kazu sira ne’ebé relasiona ho scam call centre.
Tuir Ministru Interior, Francisco da Costa Guterres katak, ministériu ne’e halo hela reorganizasaun ba implementasaun regra viza, tuir despaxu ministeriál ne’ebé sai ona.
Nia esplika katak, ajénsia balu husu atu hetan fali kompeténsia kona-ba prosesu viza, maibé pedidu sira ne’e tenke tuir lei ne’ebé vigora.
“Lei permite turista hela loron 30 no estende dala ida, tuir kondisaun no situasaun ne’ebé relevante, inklui ligasaun ho krime,” hatete Ministru Interior, Francisco da Costa Guterres ba jornalista sira iha MI, Segunda (12/10/2026).
Ministru ne’e hateten katak, nia diskute ona asuntu viza turista ho Primeiru-Ministru, inklui analiza kondisaun no problema sira ne’ebé mosu iha implementasaun.
Nia mós afirma katak, autoridade imigrasaun presiza haree ho kuidadu sidadaun estranjeiru sira ne’ebé hela naruk iha Timor-Leste, liuliu bainhira sira nia objetivu vizita la klaru.
“Turista normalmente mai vizita ita-nia rai durante semana ida ka rua. Se hela liu tempu ne’e, autoridade presiza halo verifikasaun,” nia afirma.
Francisco da Costa Guterres hatutan katak, despaxu ministeriál ne’ebé implementa agora la permite estensaun viza iha situasaun sira ne’ebé la kumpre kondisaun legal.
Nia mós temi kazu sidadaun estranjeiru ida ne’ebé, tuir nia, sai husi Timor-Leste no fila fali ho viza foun atu hela durante loron 30. Ministru ne’e afirma katak prátika hanesan ne’e taka ona.
Ministériu Interior mós halo komunikasaun ho Governu Xina, Indonézia no nasaun seluk atu buka solusaun ba problema sidadaun estranjeiru sira ne’ebé viola regra viza.
“Ita bele bandu sidadaun estranjeiru ne’ebé viola viza atu tama fali Timor-Leste durante tinan lima ka 10, tuir medida ne’ebé autoridade kompetente aplika,” nia hatutan.
Enkuantu ne’e, Akadémiku Universidade Nasionál Timor Lorosa’e (UNTL), José Costantino Ximenes subliña katak, Servisu Imigrasaun presiza hametin fiskalizasaun atu identifika sidadaun estranjeiru sira ne’ebé viola regra viza.
“Sidadaun estranjeiru ne’ebé viola viza tenke hetan medida legal, inklui haruka fila no bandu tama fali Timor-Leste durante tinan 10,” José Costantino Ximenes afirma.
(jen)
