DILI, STLTIMORLESTE.com – Daudaun nee Governu liu husi Ministeriu Interior (MI) hapara ona atividade ajensia 9 neebe trata vistu ba sidadaun estranjeiru. Nee tanba Governu deteta iha posibilidade “broker” no violasaun prosedimentu iha Servisu Migrasaun.
Ministru Interior (MI), Francisco da Costa Guterres hatete, Diresaun Servisu Investigasaun Kriminal (DSIK) no Migrasaun daudaun nee investiga hela kazu lubun boot ida. Nunee parte Migrasaun sei haree didiak iha ka lae “broker” neebe fasilita tama ilegal.
“Ami agora investiga hela, tanba iha kazu lubun boot ida. Entaun ami haree investigasaun iha Servisu Migrasaun nee iha ka lae broker. Ita halo tiha lai investigasaun depois mak ita foin bele koalia buat ruma,” hatete Ministru Interior (MI), Francisco da Costa Guterres ba jornalista sira iha Palasiu Governu, kuarta (12/08/2026).
Nia esplika, provizoriamente Governu hapara ona ajensia sira hodi trata vistu. Tuir mai, sidadaun estranjeiru tenke ba trata rasik sira nia vistu, tanba prosesu nee presiza foto pesoal.
“Ajénsia hau haruka para, sira sei la halo atendimentu. Ajensia akompanha deit nia ema sira ba, mais agora sira la ba ona trata ema estranjeiru nia visa, ema nain rasik mak sei ba trata rasik,” nia esplika.
Ministru mos alerta katak, kuandu investigasaun deteta violasaun, tenke foti sansaun. “Kuandu investiga deteta automatikamente nia tenke hetan sansaun, tanba sira mos viola prosedimentu,” nia informa.
Tuir Francisco Guterres, fiskalizasaun agora lao beibeik tanba barak mak uza sala vistu. Barak tama ho vistu turista maibe mai halo fali servisu.
“Ema estranjeiru sira nee mai balun uza sala vistu. Nia mai hanesan turista haree buat ruma mas mai halo fali servisu. Entaun ita buka tuir hotu, ita tenke buka hotu, tau buat sira nee iha nia fatin,” nia koalia.
Nia mos fo sai desizaun foun, sidadaun neebe tama ho vistu turista laiha ekstensaun, tenke fila iha loron 30 nia laran.
Ministru Interior informa katak, sidadaun estranjeiru neebe deporta sei hetan sansaun tinan 10 labele tama fali ba Timor-Leste.
“Ita koalia ho Ministeriu Publiku atu haree ba kazu neebe laos kazu boot liu ita aplika deit kausaun, selu hotu, tau vistu deporta fila durante tinan 10 labele halo movimentu iha territoriu Timor Leste,” nia deklara.
Relasiona ho kazu scam call center, Governu liu husi MI halo ona diskusaun ho Embaixada Xina iha Timor Leste. Parte rua konkorda atu haruka sidadaun Xina neebe envolve iha kazu nee fila ba sira nia nasaun.
“Governu liu husi Ministériu Interior halo ona diskusaun ho Embaixada Xina iha Timor Leste, sira koopera sira nia ema neebe mak envolve iha kazu scam call center haruka fila fali ba sira nia nasaun. Prosesu haruka fila, ita hein desizaun husi Tribunál,” nia hatutan.
Francisco Guterres husu ba sidadaun estranjeiru neebe hakarak servisu iha TL atu trata vistu servisu iha liur antes tama. Nia dehan, iha Aeroportu Internasionál Prezidente Nicolau Lobato ema hotu bele husu visa, maibe nee loke dalan ba uza sala.
“Adidu ho embaixada sira iha liur neeba sira trata deit mak vistu. Se nia visa trabalhu, se nia hakarak, nia tenke trata antes tiha mak tama mai TL, atu nunee evita uza sala vistu,” nia apela.
Ministru promete Governu sei regulariza no reorganiza fali sistema hotu hodi kontrola movimentu sidadaun estranjeiru iha rai-laran.
Iha fatin ketak, Akademista UNTL, Julio da Costa esplika, parabens ba Ministeriu Interior tanba identifika no hatene ona ajensia fasilitador 9 iha area notariadu tanba komete irregularidade iha prestasaun servisu vistu ba sidadaun estranjeiru, tenke prosesu tuir Lei neebe iha.
(jen)
