DILI, STLTIMORLESTE.com – Ministru Interior (MI) neebe mos halao knaar hanesan Ministru Defeza Internu, simu Ministru Defeza Xina, ADM Dong Jun, neebe halao vizita ofisial mai Timor Leste (TL).
Tuir komunikadu imprensa neebe STL asesu husi Servisu Relasaun Publika Ministeriu Interior iha Tersa (18/08) katak, Vizita nee sai nuudar oportunidade importante atu hametin relasaun bilateral entre TL no Republika Popular Xina, liu-liu iha area seguransa, defeza no kooperasaun institusionl.
“Importansia husi vizita nee maka parte rua sei diskute kona ba interese komum, hodi haforsa relasaun entre nasaun rua liu-liu kooperasaun iha area defeza no seguransa neebe konsidera importante atu promove estabilidade, paz no dezenvolvimentu iha rejiaun,” haktuir neebe haktuir husi komunikadu imprensa nee.
Vizita Ministru Defeza Xina, ADM Dong Jun mos reflete interese Republika Popular Xina atu kontinua haforsa amizade no kooperasaun ho TL, liu-liu iha area estratejika neebe bele fo benefisiu ba nasaun rua.
Iha okajiaun vizita nee, Ministru Interior hetan akompanhamentu husi Vise Ministra Negosius Estranjeirus no Kooperasaun (MNEK), Jesuina Maria Ferreira Gomes, Vise Xefi Estadu Maior Jeneral FALINTIL-Forsa Defeza Timor Leste (F-FDTL), Major Jeneral Calisto Santos “Coliati”, nomos Embaixadora Republika Popular Xina iha TL, Wang Wenli neebe sempre afirma kompromisu atu kontinua dezenvolve relasaun bilateral neebe bazeia ba respeitu mutua, amizade no kooperasaun, hodi kontribui ba interese no benefisiu povu Timor-Leste no povu Xina.
Entretantu tuir ajenda iha loron Kuarta Feira (19/08) Ministru Defeza Nasional Xina, Don Jun sei halao enkontru kortezia ho Primeiru Ministru Kay Rala Xanana Gusmão iha Edifisiu Ministeriu Defeza, Fatuhada, Dili.
(jos)
