DILI, STLTIMORLESTE.com – Militar Australia ho FALINTIL-Forsa Defeza Timor Leste (F-FDTL) mantein kooperasaun iha atividades ezersisiu Hari Hamutuk.
Major Jeneral Ash Colinburg hatete, ohin fila mai vizita iha nee, tempu pozitivu no diak tebes mai iha nee, no iha vizita nee koalia foka liu kona-ba ezersisiu Hari Hamutuk nian.
“Hau mos sei ba vizita hau nia membru sira iha terenu, iha Metinaru no Baukau kona-ba ezersisiu Hari Hamutuk, ida nee mos parte ida kooperasaun entre forsa Australia no Timor Leste nian kontinua nafatin,” dehan nia ba jornalista sira hafoin hasoru malu ho Xefe Estadu Maior Jeneral F-FDTL, iha Quartel General F-FDTL Fatuhada, Kinta (17/10/2024).
Nia mos hatoo agradese ba Xefe Estadu Maior Jeneral F-FDTL nia disponibilidade hodi simu nia, ida nee orgulhu tebes.
Nia mos informa, parte pozitivu atu hetan husi ezersisiu Hari Hamutuk nee mak entre F-FDTL no mos membru INTERFET nian neebe mak sira mai envolve iha ezersisiu ida nee, husi servisu hamutuk mak atu hametin liu tan relasaun entre forsa nasaun rua husi agora no mos ba iha futuru.
Nia dehan, benefisiu neebe mak atu hetan husi ezersisiu Hari Hamutuk kona-ba atividades hirak mak hanesan treinamentu iha area enjenaria no mekanik, atu nunee bele hasae liu tan sira nia konhesimentu hodi sai profisional liu tan.
(mar)
