JAKARTA, STLTIMORLESTE.com – Liu husi komunikadu Media F-FDTL neebe STL asesu katak, Membru FALINTIL–Forsa Defesa Timor Leste (F-FDTL) partisipa iha Konferensia Final Planeamentu ba Ezersisíu Multinasional Trident Resolve, neebe realiza huhu loron 04 too 06 Maiu 2026, iha Jakarta–Banten, Indonésia, iha kuadru ASEAN Defence Ministers’ Meeting-Plus Expert Working Group on Humanitarian Assistance and Disaster Relief (ADMM-Plus EWG on HADR).
Delegasaun F-FDTL nian lidera husi Xefe Seksaun Kooperasaun Sivil-Militár Tenente-Koronel Laurentino Gusmão, akompaña husi 2.º Komandante Komponente Naval, Kapitaun Fragata Grad Nicolau Sousa, no Xefe Departamentu Operasaun Komponente Terrestre, Major Nogueira Dias Quintas “Laranjina”.
Partisipasaun F-FDTL iha konferensia refere iha importansia estratéjika aas, tanba permite atu aprofunda diskusaun sira konaba kontribuisaun Nasionál iha Ezersisíu Trident Resolve, liu-liu iha area prioritária sira hanesan Asisténsia Umanitária no Alíviu Dezastre (HADR), apoiu mediku Militar no siberseguransa.
Entretantu Ezersisíu Trident Resolve sei realiza husi loron 21 to’o 26 Setembru 2026 iha provínsia Banten, Indonesia, ho partisipasaun husi Estadu-membru ASEAN no nasaun parseiru sira iha kuadru ADMM-Plus EWG.
Ezersisíu nee iha objetivu atu reforsa interoperabilidade, hadia koordenasaun multinasionál no hasae kapasidade resposta konjunta ba situasaun dezastre natural no emerjensia kompleksa sira, inklui mos komponente médiku-militár no siber.
Iha marjen konferénsia, delegasaun Timor-Leste halo enkontru bilateral ho komisaun organizadora, neebe ko-prezide husi Singapura no Nova Zelândia, no mós ho nasaun anfitriaun, Indonesia, ho objetivu atu identifika oportunidade konkretu ba partisipasaun ativa no kontribuisaun F-FDTL iha Ezersisíu refere.
Konferénsia nee halao iha ambiente kooperasaun diak, dialogu konstrutivu no reforsu relasaun amizade no konfiansá mútua entre Estadu partisipante sira.
Durante estadia iha Jakarta, delegasaun F-FDTL hetan apoiu signifikativu husi Adidu Defeza Timor-Leste bá Indonésia, Koronel Renilde Guterres Corte Real e Silva ho nia ekipa, liu husi fornesimentu informasaun relevante, aranjamentu alojamentu no transporte, neebe kontribui ba susesu partisipasaun delegasaun iha konferensia nee.
(jen)
