DILI, STLTIMORLESTE.com – Militár feto FALINTIL-Forsa Defeza Timor-Leste (F-FDTL) na’in-10 sei partisipa Workshop Feto, Páz no Seguransa (WPS) iha Darwin, Austrália, durante semana rua.
Workshop ne’e sei hala’o iha Novembru 2026, ho objetivu hasa’e kapasidade lideransa militár feto no hametin sira-nia papél iha manutensaun páz no seguransa.
Informasaun ne’e bazeia ba komunikadu imprensa F-FDTL, ne’ebé STL asesu husi mídia F-FDTL, iha Kinta-feira (22/10/2026).
Tuir komunikadu ne’e, F-FDTL no Defence Cooperation Program (DCP) Austrália kontinua hametin kooperasaun bilateral iha área kapasitasaun no dezenvolvimentu profisionál militár.
Workshop ne’e mós sei promove troka esperiénsia entre militár feto Timor-Leste no Austrália, hodi hasa’e koñesimentu kona-ba lideransa, páz no seguransa.
Partisipante sira sei aprofunda koñesimentu kona-ba Rezolusaun Konsellu Seguransa Nasoins Unidas (ONU) Nú. 1325, ne’ebé fó atensaun ba partisipasaun feto iha páz no seguransa.
Rezolusaun ne’e subliña importánsia partisipasaun feto iha prevensaun no rezolusaun konflitu, manutensaun páz no prosesu harii páz sustentável.
Durante programa ne’e, partisipante sira mós sei hetan vizita espesiál husi Vise-Primeiru Ministru no Ministru Defeza Austrália, Richard Marles, hamutuk ho delegasaun DCP.
Vizita ne’e ho objetivu atu haree diretamente prosesu formasaun ne’ebé hala’o liuhusi kooperasaun entre F-FDTL no Austrália.
Partisipasaun militár feto na’in-10 ne’e hatudu kompromisu F-FDTL atu promove igualdade jéneru, hametin lideransa feto no asegura oportunidade hanesan ba militár feto no mane.
Durante tinan barak, F-FDTL no DCP Austrália dezenvolve kooperasaun iha área formasaun lian Inglés, lideransa, lojístika, enjenharia no dezenvolvimentu institusionál.
Programa formasaun sira ne’e kontribui ba hasa’e kapasidade, profisionalizmu no dezenvolvimentu rekursu umanu iha instituisaun F-FDTL.
F-FDTL hein katak koñesimentu no esperiénsia ne’ebé partisipante sira sei hetan bele kontribui ba dezenvolvimentu institusionál no hasa’e prontidaun profisionál militár.
Kooperasaun ne’e mós espera bele hametin papél Timor-Leste iha manutensaun páz, seguransa no estabilidade, tantu iha nivel nasionál no rejionál.
(jen)
