BAUKAU, STLTIMORLESTE.com – Relasiona udan boot neebe akontese iha fulan Fevereiru tinan nee, mini irrigasaun hamutuk 6 iha Postu Administrativu Vemasi hetan estraga
“Udan boot neebe akontese foin lalais nee kuaze afeta ba kanal irrigasaun neebe oferese bee ba komunidade vida agrikultor nian, kauze irigasaun 6 mak afeta iha mota Vemasi,” hateten Xefe Suku Kuikua Postu Vemasi, Anibal Henrique da Costa ba STL iha Vila Nova, Kuarta (12/02/2025).
Nia konta, mini irigasaun 6 neebe hetan estragus mak hanesan mini irrigasaun Eraruri, Tuluwake, Boili, Sukaer Laran, Buabai no Uatubuta, neebe fo impaktu ba natar hamutuk hektare 800 resin iha Suku Kaibui, Vemasi Tasi inklui Aldeia Uaiharebo’o Suku Uatilari.
Nia fundamenta, mini irigasaun refere antes nee hetan estragus uluk, nunee parte Autoridade Suku relata ona pedidu ba Diresaun Servisu Agrikultura Munisipiu Baukau no hetan ona responde, maibe kauza husi udan boot neebe akontese, kontinua fo impaktu ba natar sira, tanba mini irrigasaun sira kontinua hetan estragus.
“Tanba nee komunidade sira iha neeba ezije tau netik ekipamentus pezadu ida iha neeba permanente too kolheta,” Anibal Henrique da Costa akresenta
Tanba fini haree tonelada 10 neebe Diresaun Servisu Agrikultura Munisipiu Baukau distribui ba kada Postu Administrativu, neebe tuir dadus Postu Vemasi hetan kilograma hamutuk 2.000 kobre natar hektare hamutuk 133 neebe inklui Suku Kaikua hetan kilograma 48 kobre natar hektare 10.
Nunee Anibal Henrique da Costa husu Governu liu husi Diresaun Servisu Agrikultura Munisipiu Baukau atu apoiu ekipamentus pezadu (eskavator) 1 destaka permanente iha mota Vemasi hodi halo normalizasaun, bainhira akontese udan boot estragus irrigasaun sira.
Liga asuntu nee, STL tenta konfirma Diretor Servisu Agrikultura Munisipiu Baukau, maibe laiha fatin atu fo komentariu, tanba tuir informasaun husi funsionariu sira iha edifisiu agrikultura Vila Nova katak, Diretor iha hela Postu Administrativu Kelikai Antigu distribui fini ba agrikultores sira.
(EST 2)
