DILI, STLTIMORLESTE.com — Projeitu konstrusaun mini kampu futebol iha Suku Bidau, Dili, atinji ona progresu 48%, maski hasoru obstákulu ne’ebé kauza obra para durante fulan rua.
Enjenheiru kompanhia Aka-Lestarindo LDA, Adão dos Santos Cabral hateten, informasaun ne’e iha fatin konstrusaun mini kampu futebol Bidau, segunda-feira, 12 Outubru 2026.
Nia esplika katak, progresu 48% ne’e inklui ona edifísiu administrasaun, locker A no locker B, tribun, kampu futebol no lutu hale’u kampu ne’ebé instala ona rede protesaun.
Tuir Adão, kompanhia hasoru problema kona-ba dokumentus traballadór estranjeiru balun ne’ebé mai husi Java, Indonézia, no tenke fila fali ba sira-nia nasaun.
“Durante ne’e, traballadór balun mai husi Java, Indonézia, hasoru problema ho dokumentus no fila fali ba Indonézia. Ida-ne’e fó impaktu ba projetu, ne’ebé para durante fulan rua, no agora foin kontinua fali,” Adão hateten.
Maski hasoru atrazu, kompanhia kontinua hala’o konstrusaun atu kompleta infraestrutura desportiva ne’e, ne’ebé sei sai fatin ba komunidade atu hala’o atividade futebol.
Projeitu konstrusaun mini kampu futebol Bidau ne’e hala’o husi kompanhia Aka-Lestarindo LDA, ho períodu implementasaun fulan neen no orsamentu total US$ 665.916.
Konstrusaun mini kampu ne’e espera bele apoia dezenvolvimentu desportu, liuliu futebol, no fó oportunidade ba juventude atu dezenvolve sira-nia kapasidade liuhusi atividade desportiva.
(leo)
