DILI, STLTIMORLESTE.com – Ministeriu Juventude Desportu Arte no Kultura (MJDAK) orienta Komisaun Reguladora Arte Marsiais (KRAM) atu koordena servisu ho autoridade relevante hodi prepara kondisaun, molok tinan oin governu iha planu reativa hikas atividade pratika Arte Marsiais.
Prezidente KRAM, Octavio da Conceição hatete, Ministeriu Juventude Desportu Arte no Kultura hamutuk ho Komisaun Reguladora Arte Marsiais kontinua simu ordem husi Governu neebe mak lidera husi Primeiru Ministru, kona-ba kontinuasaun ba suspensaun atividades pratika Arte Marsiais rezolusaun no 45 /2024 neebe mak kontinua ho rezolusaun no 17/2024, husu atu suspende pratika atividades Arte Marsiais.
Nia haktuir, bazeia rezolusaun no 17/2024 mos fo servisu ba Ministeriu Juventude Desportu Arte no Kultura hamutuk ho Komisaun Reguladora Arte Marsiais atu atu halo ona servisu preparasaun sira oinsa mak kuandu rezolusaun nu 45 nee nia terminasaun iha fo hodi reativa fali Arte Marsiais iha ona kondisoens natoon para implementa ona kompetisaun desportu SILAT iha terioriu laran tomak.
“Entaun liu husi orientasaun Ministru Juventude Desportu Arte no Kultura orienta ona KRAM atu halo ona koordenasaun servisu ho Autoridade Munisipiu sira, Komando PNTL, Prezidensia Autoridade Munisipiu sira no estrutura Federasaun Silat iha Munisipiu para komesa halo ona koordenasaun, oinsa mak transmite informasaun hotu-hotu atu intende idak-idak desizaun Konselhu Ministru nian neebe fo sai ona,” dehan Octavio ba jornalista sira iha sede KRAM, Lecidere, Dili, Segunda (04/11/2024).
Nia akresenta, em prinsipiu governu haree katak situasaun lubuk ida neebe hotu-hotu ultrapasa, enkuantu loron hirak liu selebrasaun loron matebian joven pratikante Arte Marsiais sira kontribui ba paz no estabilidade iha Timor laran tomak.
“Nee pasu sira neebe importante tebes governu konsidera ida nee, hanesan kontribusaun ida ba estabilidade no pas iha rai laran,” katak nia.
Nia hatete, agora daudaun KRAM ho estrutura FESTIL enkontru dala rua ou dala tolu ona, KRAM sei ajuda sira para depois sira bele estabelese estrutura FESTIL iha Munisipiu sira neebe nia mak seidauk estabelese estrutura FESTIL iha neeba.
(mar)
