BAUCAU, STLTIMORLESTE.com – Ministériu Obras Públikas (MOP) aloka orsamentu rihun US$ 179.374,88 ba komunidade afetadu projetu alargamentu estrada Urbana Baucau Vila hamutuk 56.
Dadus indemnizasaun ba komunidade afetadu husi projetu reabilitasaun no alargamentu Estrada Urbana Baucau Vila, Munisípiu Baucau, hamutuk 56 afetadu, lista iha ona edifísiu Servisu Munisípal Obras Públikas Baucau.
Dadus refere kompostu hosi afetadu iha pakote dahuluk hamutuk 26 no pakote daruak hamutuk 30, ho tipu afetasaun ne’ebé inklui kios, oficina, rezidénsia, moru, aramajen, postu seguransa privadu, loja, rampa, baraka no estrutura sira seluk tán ne’ebé tama iha área alargamentu estrada.
Liuhusi públikasaun no asinatura termu dadus espropriasaun privadu ne’ebé afeita ba projetu alargamentu Estrada Urbana Baucau Vila, Ministériu Obras Públikas liuhusi Direksaun-Jerál Estradas, Pontes no Prevensaun no Kontrolu Cheias, hamutuk ho Direksaun Nasionál Planeamentu, Peskiza no Dezenvolvimentu, halo prosesu rekoilha no verifikasaun dadus komunidade afetadu.
Ba pakote dahuluk, ne’ebé hosi Nargardjo to’o HoREX Baucau, komunidade afetadu hamutuk 26, ho estimasaun orsamentu espropriasaun privadu US$89.032,88. Valor ne’e inklui kontejénsia 10% US$8.903,29, nune’e totál orsamentu hamutuk rihun US$97.936,17.
Enkuantu ba pakote datolu, ne’ebé hosi Rotunda Vila Nova to’o área edifísiu Edukasaun, inklui trosu hosi ADN, BCTL, Tribunal to’o Suku Tirilolo, área Lamegua, komunidade afetadu hamutuk 30. Estimasaun orsamentu espropriasaun privadu hamutuk US$74.035,19, inklui kontejénsia 10% US$7.403,52, ho totál rihun US$81.438,71.
Diretor Servisu Munisípal Obras Públikas Munisípiu Baucau, Agostinho Ximenes, hateten katak dadus afetadu sira rekoilha liuhusi prosesu públiku no afetadu sira fó ona deklarasaun kona-ba estrutura sira ne’ebé afeita ba projetu refere.
“Dadus ne’e ita rekoilha afetadu husi nasional ita publika. Afetadu sira mai hetan hotu ona nia deklarasaun katak, projetu bele lao depois mak hetan indemnizasaun tuir stake-out estrada kona, hanesan varanda, uma tomak, entaun nia klase keta-ketak, orsamentu mos lao tuir ida ne’e,” hateten Agostinho ba STL iha nia knaar-fatin Vila Nova, Baucau, Kuarta (16/09/2026).
Nia esplika, estimasaun orsamentu ba espropriasaun privadu ne’ebé afeita ba projetu alargamentu Estrada Urbana Baucau Vila, kompensa iha nivel nasional tuir kategoria espropriasaun no nivel estragus ba estrutura sira ne’ebé tama iha área alargamentu estrada.
Nia subliña mós katak komunidade afetadu sira fó ona aseitasaun ba valor indemnizasaun ne’ebé determina tuir kategoria no estragus. Maibé, kona-ba osan indemnizasaun refere to’o ona iha konta bankária afetadu sira ka seidauk, Servisu Munisípal Obras Públikas Baucau seidauk hetan informasaun klaru kona-ba transferénsia osan refere.
“Kona-ba indemnizasaun ne’ebé Governu transfere ne’e, ami mós la hatene ona tanba iha nasional hotu. Ami hanesan subtitui deit. Afetadu ne’e kompostu Suku Tirilolo, Bahu no Builai balu,” Agostinho Ximenes hateten.
Indemnizasaun refere, tuir informasaun husi parte Servisu Munisipál Obras Públikas Baucau, kobre de’it ba pakote dahuluk no pakote datolu. Enkuantu ba pakote daruak, ne’ebé kontinua husi área Hospital Rejional Eduardo Ximenes (HoREX) Baucau, liu rotunda Vila Nova, Estadiu Laikana, Bugaiti to’o iha área Tribunal Distrital Baucau, seidauk iha dadus kona-ba indemnizasaun.
Situasaun ne’e akontese tanba iha área refere, prosesu levantamentu dadus ba propriedade ka área ne’ebé sei afetadu husi projetu estrada urbana seidauk hala’o hosi Servisu Munisipál Obras Públikas Baucau.
(tom)
