DILI, STLTIMORLESTE.com – Bainhira hetan moras Tuberculoze (TBC), pasiente sira tenke hemu aimoruk ho rutina fulan 6 too 8, atu nunee bele hamate kutun moras nee. Se la hemu aimoruk too remata kutun TB sei forte no presiza aimoruk neebe forte liu tan.
Liafuan nee haktuir husi pessoal saude programa TBC, bainhira halo atendementu no fo esplikasaun bá pasiente neebe halo tratamentu moras TBC iha sentru Saude Komoro, Segunda (18/05/2026).
Ba pasiente TBC neebe foin atu hahu halo tratamentu ka hemu aimoruk iha sentru no postu saude sira, antes atu simu aimoruk sei rona uluk esplikasaun husi pesoal saude sira. Bainhira pesoal saude sira halo ona atendementu no fo esplikasaun, foin moras nain sira simu aimoruk semana ida nian hodi hemu iha uma, depois hotu mai foti fali iha sentru saude durante fulan 6 too 8.
Iha esplikasaun pesoal saude sira fahe informasaun kona bá moras ida nee nian no oinsa halo tratamentu neebe diak, atu nunee kutun TBC nee bele mate. Pesoal saude sira husu bá pasiente sira atu hemu aimoruk ho rutina Fulan 6 too 8 atu nunee kutun TBC bele mate, maibe bainhira la hemu aimoruk kompletu too fulan neebe mensiona kutun TBC sei forte liutan no aimoruk neebe hemu mos sei forte liutan.
Tuir Pasiente Maria de Jesus hatete, foin hahu halo tratamentu hemu aimoruk bá moras TBC iha Sentru nee hahu iha Maiu nee. Fofoun mai sei rona uluk informasaun no esplikasaun pesoal saude sira kona bá moras nee, mak foin simu aimoruk hodi hemu iha semana rua nian, depois hotu mak mai foti fali. Aimoruk neebe simu loron ida hemu musan 8.
“Bainhira hemu tiha aimoruk nee haufoin senti diak, selae mear tasak nee halo hauu nia hirus matan moras isin manas be doko no vontade han laiha. Situasaun nee halo hau senti triste no moras hela deit maibe depois mai konsulta no tuir programa tratamentu TBC nian halo hau senti diak oituan ona,” dehan nia bá STL.
Nia hatete, foin hemu seidauk to fulan mos senti iha mudansa oituan ona, neemak hemu too fulan 8 sei diak liutan. Neebe tenke halo tuir duni mediku no pesoal saude sira katak tenke hemu kompletu fulan 6 too 8, para moras nee bele lakon.
Nia katak, iha mediku no pesoal saude sira nia esplikasaun nee Laos koalia deit kona bá hemu aimoruk, maibe esplika mos kona bá aihan Nutrisaun neebe presiza han bá isin lolon no prevene aan husi hahalok moris neebe bele fo impaktu fali bá moras nee.
(dom)
