DILI, STLTIMORLESTE.com — Movimentu Reafirmasaun Reformasaun Nasonal (MORENA) konsidera problema sosial iha rai laran aumenta grave, no deklara prontu atu luta hasoru neokolonializmu, imperializmu, submetidu ba poder oligarkia no deskonfia mafia neebe ukun hela, hodi bele lori reforma agraria neebe garante rai, uma no servisu ba Timoroan hotu.
Prezidente MORENA, César Valente, hateten katak situasaun difisil neebe povu hasoru ohin loron, nuudar rezultadu husi sistema ukun neebe monu ona ba rain oligarkia no mafia sira sira liman. Tanba nee MORENA hamriik metin hodi luta hasoru neokolonializmu, no imperialismu neebe hanehan hela dezenvolvimentu rai laran.
“Problema sosial munisipiu no nasional aumenta grave no seriu liutan. Tanba nee mak MORENA hamriik hodi luta hasoru neokolonializmu ho imperialismu. Nasaun ohin loron halibur deit oligarkia no deskonfia mafia sira mak ukun,” dehan César Valente bainhira dada lia ho STL, iha Delta, Díli, Tersa (21/07/2026).
Hodi responde ba dezafiu boot sira nee, Prezidente MORENA nee sublina katak pasu prinsipal neebe Movimentu nee sei foti, mak halao reforma agraria neebe loloos no integrál.
Tuir MORENA, reforma agraria nuudar xave boot sosial hodi garante katak Timoroan hotu-hotu bele asesu ba rai, asegura populasaun hotu labele menus uma neebe digne, no kria kampu servisu neebe luan no sustentavel ba sidadaun sira.
MORENA fiar katak, hodi halo deit mudansa radikal hasoru sistema oligarkia no fo fali direitu fundasaun rai nian ba povu, mak Timor-Leste bele sai husi krizi sosial no kria justisa neebe loos ba povu kiik sira.
Iha parte seluk, Observador Polítika, António Magno, konsidera katak krítika no vizaun neebe MORENA hatoo nee, nuudar reflesaun husi sentimentu frustrasaun nian neebe mosu iha sosiedade nia leet.
Maske nunee nia sublina katak, dezafiu boot ba Movimentu nee mak oinsa transforma diskursu no narativa hasoru oligarkia nee ba fali kampanha polítika ida neebe estruturadu, hodi nunee bele konvense duni povu votante sira kona-ba planu reforma agraria neebe sira propoe.
Aleinde nee Akademiku husi Universidade da Paz (UNPAZ), Januário de Araujo, fo hanoin katak abordajen kona-ba reforma agraria presiza bazeia ba estudu sientífiku no enkuadramentu legal neebe klean, laos deit sai nuudar promesa polítika.
Tuir nia, implementasaun reforma agraria neebe susesu tenke inklui mis modernizasaun setor agríkultura no fasilidade kreditu ba agrikultor sira, atu nunee bele lori duni rezultadu neebe kria kampu servisu no hamanarak dezafiu ekonomiku neebe povu hasoru.
(car)
