DILI, STLTIMORLESTE.com – Visi Ministru Fortalesimentu Institusional Saude (VMFIS), Jose dos Reis Magno asina Memorandu Entendimentu (MoU) entre Ministeriu Saude ho Klínika Ordem de Malta Timor Leste, no entrega ambulansia rua ba ministeriu nee.
Serimonia nee halao iha Salaun Palacio das Cinzas, Kaikoli, Kuarta (06/05/2026).
Liu husi asina MoU nee Ministru hatete, durante tinan hirak nee nia laran, Ordem de Malta fo ona kontribuisaun valiozu hodi hametin servisu saude iha TL, liuliu iha prestasaun kuidadu saude primaria, apoiu ba komunidade vulneravel, saude inan no oan, prevensaun no kontrolu moras, servisu saude movel (outreach), no asistensia umanitaria.
“Hau mos hakarak hatoo ami nia gratidaun klean ba doasaun generozu ambulansia rua ba Ministeriu Saude, neebe entrega ofisialmente husi reprezentante Ordem de Malta nuudar espresaun konkreta husi solidariedade no kompromisu ba povu Timor-Leste, apoiu ida-nee iha importansia boot tebes ba ita-nia sistema saude nasional, liuliu iha fortalesimentu kapasidade resposta emerjensia no mellora referensia no transportasaun ba pasiente sira neebe presiza kuidado mediku urjente,” dehan nia liu husi pajina MS neebe STL asesu Kinta (07/05/2026).
Nia katak, asinatura Memorandu Entendimentu ida-nee reprezenta buat neebe boot ba kooperasaun institusional, solidariedade, no parseira estratejika neebe iha objetivu hodi mellora kualidade no asesu ba servisu saude ba populasaun, MoU ida-nee estabelese koordenasaun neebe klaru entre MS no Klínika Ordem de Malta hodi asegura katak atividade klínika nian aliña ho prioridade saude nasional.
“Ita rekoñese katak asesu ba transporte mediku iha tempu neebe loos bele salva vida. Tan nee, ambulansia sira-nee sei kontribui diretu hodi mellora asesu ba servisu saude, liuliu ba pasiente sira neebe presiza transferensia ba fasilidade neebe iha nível kuidade no tratamentu espesializadu.
Kontribuisaun ida-nee mos demonstra katak kooperasaun internasional no solidariedade umanitaria kontinua iha papel vital iha dezenvolvimentu no fortalesimentu setor saude iha Timor-Leste.
Ministeriu reafirma nia kompromisu atu kontinua serbisu besik ho parseiru nasional no internasional hotu hodi asegura katak kontribuisaun hotu neebe simu sei utiliza ho transparensia, efisiensia, no ba benefísiu direta populasaun nian.
(dom)
