DILI, STLTIMORLESTE.com – Relasiona ho programa implementasaun Wolbachia iha Timor Leste (TL) mak Ministeriu Saude (MS) kolabora hamutuk ho Menzies TL realiza workshop kona-ba World Mosquito Program (WMP) no Action on Poverty (AOP).
Senior Technical Adviser for Menzies Timor Leste, Nelson Martins dehan, atividade ohin nee kona-ba programa implementasaun Wolbachia iha TL, tanba nee MS hamutuk ho Menzies hodi konvida Asosiasaun Profisional sira liu-liu iha area saude hanesan saude animal nomos ambiental, depois NGO sira neebe mai fahe informasaun atu dezamina kona-ba programa Wolbachia .
“Ida nee preparasaun ikus ona para ita atu halo lansamentu susuk neebe hetan ona infeksaun baktéria ida bolu Wolbachia, ita atu lori mai husik iha Timor, objetivu atu hamenus moras dengue, zika, chikungunya no yellow fever liu husi implementasaun metodu Wolbachia iha TL,” hatete Senior Technical Adviser for Menzies Timor Leste, Nelson Martins ba jornalista sira iha INSP-TL Komoro, Dili, Sesta (04/04/2025).
Nia dehan, aprezentasaun mos koalia kona-ba saida mak Wolbachia nee no maneira oinsa atu distribui, depois impaktu nee oinsa, atu nunee hotu-hotu bele komprende depois implementasaun ba Métodu Wolbachia nee rasik.
“Wainhira MS halo lansamentu ba programa nee hotu-hotu apar ona no bele fo apoiu,” nia deklara.
Iha fatin hanesan, Demotolojia iha Ministeriu Saude (MS), Manual Gusmão Carvalho informa, tuir teoria neebe mak iha too agora seidauk iha impaktu ba komunidade. “Tanba baktéria Wolbachia nee iha insentu sira iha ita nia rain nee iha hotu ona, hanesan lalar, dihi, bani, agora nee susuk mak seidauk iha, tanba nee tau fali ba susuk nee para labele transmite moras ba ema,” nia informa.
Nia afirma, wainhira Wolbachia nee iha susuk ona virus nee labele kembang diak iha susuk nee nia laran no labele dezenvolve nian aan hodi transmite moras dengue ba ema.
(jen)
