DILI, STLTIMORLESTE.com – Ministeriu Saude (MS) prevee orsamentu hamutuk rihun US$ 500 ba Dirijente Organizasaun Saúde Mudiál iha mundu, no konfirmadu sei partisipa reuniaun rejiaun Komite Rejional Organizasaun Mundial Saude ba Rejiaun Sudeste Aziátiku (OMS-SEARO) ba dala 79 neebe mak Timor Leste (TL) sei sai uma nain iha loron 07 too 09 fulan Setembru tinan 2026.
Ministra Saude (MS) Élia A.A. dos Reis Amaral hatete, los duni konaba reuniaun rejiaun Komite Rejional Organizasaun Mundial Saúde ba Rejiaun Sudeste Aziátiku (OMS-SEARO) ba dala 79 neebe mak sei realiza iha tempu badak, mak Ministeriu Saude prevee ona orsamentu ba eventu refere rihun US$ 500, konfirmadu katak dirijente husi Organizasaun Saude Mudial sei partisipa iha enkontru refere.
“Ba iha nee rihun US$ 500, depois rihun US$ 100 ita halo koordenasaun no memorandu entendimentu ho Organizasaun Mundiál Saude, tanba bainaka balun husi internasional liu-liu boot husi Organizasaun Saude Mudial, Doutor Tedros Adhanom Ghebreyesus konfirmadu atu mai ita nia rai ho mos Ministru Saude sira seluk husi nasaun 10 no mós Diretor Jerais sira husi Jenebra neebe mak durante nee apoiu masimu oinsa ita bele Kombate moras Tuberkuloze, HIV-SIDA no Lepra,” hatete Ministra Saude (MS) Élia A.A. dos Reis Amaral ba jornalista sira iha MS, Kinta (13/08/2026).
Nia tenik, konaba preparasaun nee daudaun tama ona ba 80%, no tempu badak Ministeriu Saude hamutuk ho Organizasaun Saude Mudial sei halo simulasaun, atu nunee bele intensifika ba iha preparasaun ba iha SAERO nian iha Timor Leste.
“Ita nia preparasaun tama ba 80% ona, tempu badak ami sei halo simulasaun atu nunee bele intensifika ba iha enkontru global iha rejiaun SAERO nian neebe mak Timor Leste sei uma nain iha fulan Setembru tinan nee,” nia esplika.
Nia dehan, fatin neebe Governu mak sei realiza iha CCD.
“No prinsipiu fatin neebe mak ita realiza iha CCD sei ba iha abertura, depois ita kontinua ho Palm Spring, depois jantar primeiru neebe mak ita nia bainaka sira neebe mak mai iha ita nia rai, enprinsipiu iha Palásiu Nobel Lahane, sei jantar ba ita nia bainaka sira neebe mai iha ita nia rai, no mos konvidadus espesial balun,” nia Informa.
Nia hatutan, eventu nee rasik sei realiza durante loron tolu, hahú husi loron 07 too 09 fulan Setembru tinan 2026.
“Sei realiza hahú husi dia 07 too dia 09, ida nee ita dehan katak enkontru durante tres dias nee, maibe ami dehan katak bainaka mai hahu husi dia 06 too dia 10, atu nunee balun too sei deskansa karik bele deskansa,” katak nia.
Governmente nee koalia, aprezenta preparasaun ba reuniaun Komite Rejional Organizasaun Mundiál Saúde ba Rejiaun Sudeste Aziátiku (OMS-SEARO) ba dala 79 neebe Timor Leste sei sai uma nain iha tinan 2026.
Timor Leste nuudar Estadu Membru husi Organizasaun Mundiál Saude dezde tinan 2002 no integra iha OMS-SEARO dezde tinan 2003, sai ona uma-nain ba reuniaun Komité Rejionál ba dala-69 iha tinan 2015.
Iha fatin ketak, Akademista UNTL, José Costantino da Costa Oliveira informa, reuniaun Komite Rejional Organizasaun Mundial Saude ba Rejiaun Sudeste Aziátiku (OMS-SEARO) ba dala 79 neebe Timor Leste sei sai uma nain iha tinan 2026.
“Hau fo parabens ba Timor.Leste sei asume fila-fali papel nuudar uma nain ba sorumutu nivel altu ida nee, neebe sei halao iha Dili, tenke susesu nafatin hodi hamorin Timor nia naran,” nia koalia.
Entretantu eventu refere hetan partisipasaun husi Ministru Saude no responsavel importante sira husi Estadu-Membru rejiaun nee nian, nuudar espasu importante ida ba diálogu no koordenasaun konaba prioridade no polítika iha setor saude, hodi kontribui ba reforsu kooperasaun rejional no mos hadia sistema saude no resposta ba dezafiu komun sira, reuniaun nee sei partisipa husi Estadu membru sira hanesan Ministru Saude sira husi Índia, Nepal, Bangladesh, Maldivas, Srilanka, Tailándia, Mianmar, Korea no mos Timor Leste rasik.
(jen)
