AMBENO, STLTIMORLESTE.com — Vise Ministra Solidariedade Sosial no Inkluzaun (MSSI), Céu Brites simu Uma Mahon ida husi RAEOA atu sai fatin tranzitóriu no seguru ba vítima violénsia, inklui feto, labarik no mane.
Céu Brites simu Uma Mahon ne’e durante vizita servisu iha Hospital Referál Oecusse (HRO), Kuarta-feira (16/09/2026), hamutuk ho Sekretária Rejionál ba Asuntu Sosiál no Organizasaun Komunitária, Merita Marques Lafu.
Céu Brites hatete katak Uma Mahon ne’e konstrui hosi Autoridade Rejiaun Administrativa Espesiál Oecusse-Ambeno (RAEOA), no agora MSSI sei responsabiliza ba jestaun no servisu iha uma ne’e.
“Uma Mahon ne’e hala’o tiha ona asinatura akordu entre Ministra Solidariedade Sosial no Inkluzaun, Veronica das Dores, ho Prezidente Autoridade RAEOA, Regio da Cruz Salu. Tanba ne’e, ohin ami hala’o serimónia entrega aset, inklui mobiliáriu, iha Uma Mahon Oecusse,” dehan Céu Brites.
Nia esplika katak jestaun Uma Mahon la’ós responsabilidade MSSI mesak, maibé sei hala’o liuhusi kooperasaun ho Sekretaria Rejionál Asuntu Sosiál Oecusse atu fahe responsabilidade no garante servisu ba vítima sira.
“Ita hotu hatene katak iha Oecusse iha mos Uma Paz, ne’ebé uluk MSSI apoia, maibé tanba iha problema tékniku balun, apoiu ne’e hapara. Agora Uma Paz hetan apoiu hosi parseiru sira, maibé ho Uma Mahon ne’e prontu ona, vítima sira sei transfere hosi Uma Paz mai Uma Mahon ne’ebé Governu RAEOA oferese ba MSSI,” afirma Céu Brites.
Nia hatete, Uma Mahon sei fó protesaun no apoiu ba feto sira ne’ebé hasoru problema iha uma laran, inklui violénsia doméstika, violénsia seksual no forma violénsia seluk, atu vítima sira hetan tratamentu diak no apoiu durante prosesu rekoperasaun antes fila fali ba família.
Iha parte seluk, Sekretária Rejionál ba Asuntu Sosiál no Organizasaun Komunitária, Merita Marques Lafu, hatete Uma Mahon ne’e sai parte hosi servisu sosiál MSSI nian no entrega uma ne’e la signifika katak servisu sosiál sei para.
“Governu sentral hanoin ida deit, servisu tenki lao. Uma Mahon ne’e parte hosi MSSI, liuliu iha área Direksaun Asaun Sosiál, maibé servisu tenki kontinua atu benefisiáriu sira, ema hosi RAEOA, hetan atendimentu,” dehan Merita.
Nia hatete, atendimentu ba vítima sira sei hala’o tuir rekerimentu no padraun ne’ebé Governu estabelese ona, ho objetivu atu hadi’a qualidade servisu no garante vítima sira hetan fatin ne’ebé seguru no dignu.
“Uma ne’ebé ita harii ona ba vítima no benefisiáriu sira, ita kontinua servisu sira ne’ebé iha, hodi garante vítima sira hetan fatin ne’ebé dignu no diak liu tan. Ida ne’e servisu governu, parte hosi MSSI no Autoridade iha área sosiál, atu hanoin ida deit no fó atendimentu diak liu ba benefisiáriu sira,” nia hatutan.
Céu Brites mos hatete katak Uma Mahon sei uza hanesan fatin tranzitóriu ba vítima violénsia doméstika, inklui feto, labarik no mane sira ne’ebé presiza protesaun no apoiu.
Nia hatutan katak Uma Mahon ne’e antes hala’o ona inaugurasaun ofisiál hosi Prezidente RAEOA, no agora responsabilidade ba uma ne’e transfere ba MSSI liuhusi akordu entre lideransa rua.
“Ita ohin halo akordu entrega Uma Mahon ne’e entre Prezidente RAEOA ho Ministra, inklui mobiliáriu no sasán sira ne’ebé iha uma ida-ne’e,” nia afirma.
Nia subliña katak Uma Mahon sei kontinua sai fatin tranzitóriu ba vítima sira ne’ebé presiza protesaun no apoiu, ho objetivu atu garante sira hetan atendimentu ne’ebé apropriadu, seguru no dignu.
(jos)
