DILI, STLTIMORLESTE.com – Ministru Transportes no Komunikasoins (MTK), Miguel Marques Gonçalves Manetelu aprezenta progresu servisu neebe alkansa ona iha implementasaun Sistema Kabu Submarinu Sul Timor Leste (TLSSC) no rede fibra otika terrestre nasional ba konselhu Ministru (KM).
Tuir Ministru Transporte no Komunikasaun, Miguel Marques Gonçalves Manetelu ba jornalista sira, hafoin aprezenta Progresu serbisu TLSSC no Rede fibra Otika iha reuniaun Konselhu Ministru iha Palasiu Governu, Kuarta (01/07/2026) katak, aprezentasaun nee relata kona ba finalizasaun instalasaun no teste ba fiu submarinu internasional, neebe deklara tiha ona prontu ba operasaun komersial, nunee mos kriasaun empreza publika Cabos de Timor Leste, EP, neebe responsavel ba jestaun infraestrutura estratejika nee no progresus neebe hetan ona iha nia operasionalizasaun.
“Ohin komisaun TLSSC ho ami MTK mai aprezenta ba KM, kona ba progresu instalasaun kabru fibra otika, prosesu kuaze konklui, preparasaun iha Bebonuk mos kuaze konklui, tanba nee maka ohin iha aprezentasaun nia rohan, husi Primeiru Ministru Kay Rala Xanana Gusmao nia tempu, ami fo tempu iha loron 20 too 30 de Julhu nee, para ita ba halo lansamentu,” dehan Ministru Miguel Marques Gonçalves Manetelu.
Nia haktuir tan katak, iha enkontru nee membru governu balun sujere atu haree loron boot sira iha nasaun TL, balun temi 30 Agostu, maibe ohin hateten ona ba sira katak nee kleur liu, neebe ohin husu atu bele inaugura iha tempu badak.
“Lansamentu ida nee nuudar atividades komersial governu nian, tanba nee Operador 3 iha TL mak Timor Telekom, Telemor no Telkomcel maka sei sosa husi ita hodi fornese ba ita nia komunidade sira, maibe kona ba fibrr otika ninia funsionamentu ba serbisu estadu, ida nee maka durante nee governu esforsu tanba ida nee MTK maka responsabiliza, maibe ba komunidade enjeral nee, ida nee husi operadores 3 ho ISP nee iha TL besik 20 resin sira maka fornese deit Internet, sei ita koalia konaba operadores tanba iha telephone no fornese internet, sira mak responsabiliza,” haktuir nia.
Iha enkkontru nee Ministru Miguel Marques Gonçalves Manetelu aprezenta mos asaun prinsipal sira neebe halao daudaun, neebe inklui preparasaun ba inisiu operasaun komersial, reforsa kapasidade operasional empreza nian, aumentu redundansia ligasaun internasional, hametin siberseguransa nomos expansaun rede fibra otika nasional ho objetivu atu hametin konektividade dijital nasional no impulsiona ekonomia dijital.
(jos)
