DILI, STLTIMORLESTE.com – Lori letratu no estatua Nain Feto tama sai bairu no uma kain laos tanba adora, maibe respeitu Nain Feto nuudar Jesus Nia Inan, tanba Nia mos hola knaar iha ema sarani katolik idak-idak nia salvasaun no ema espesial iha Maromak nia futar oin.
Liafuan nee haktuir husi Amu Selebrante, Pe. Matias Mendonça Marsal de Jesus, SDB liu husi nia omilia bá sarani sira bainhira prezide misa Nain Feto Maria Auxiliadora tama iha bairu BTN-3, Tasi-Tolu, Sesta (08/05/2026).
Nia hatete, Nain Feto laos Maromak, Jesus mak Maromak, maibe tanba Nain Feto kous Jesus neemak halo Nia mos espesial iha Maromak Nia futar matan. Nain Feto mos terus hamutuk ho nia oan lori salvasaun bá ema hotu, neebe Nain Feto mos importante.
“Ita lori letratu no estatua tama sai bairu laos tanba adora Nain Feto, maibe ita respeitu Nain Feto nudar Jesus Nia Inan. Nia mos hola knar iha ita Ema idak-idak nia salvasaun, Nia mos terus hamutuk ho Nia oan lori salvasaun ba ema hotu, neebe Nain Feto mos importante. Nia hola knar mediatrix salvasaun ba ema sarani ida-idak iha moris tomak,” dehan nia.
Padre nee dehan, Nain Feto sai Eva neebe foun, Eva neebe lori sala tanba mundu. Eva i Ave ida neebe foun lori grasa Maromak nian tama iha mundu atu halo ema hotu hetan grasa Maromak nian. Eva halo sala, Ave lori grasa, Nain Feto ema espesial iha ema katolika sira nia oin, tanba Nia lori ema besik ba Jesus.
Padre katak, fiar bá Maromak laos buat ida fasil deit, fiar Maromak problema oioin mosu hela deit, maibe buat neebe importante mak tau konfiansa nafatin bá iha Maromak.
“Nee.mak Nain Feto sai ezemplu diak ida mai ita, maske nia hasoru terus oioin iha nia moris maibe Nia tau nafatin konfiansa iha Maromak. Nia simu buat hotu ho haraik aan, tau buat hotu iha nia laran deit, no entrega buat hotu ba Maromak. Hanesan oan, ita hotu lao tuir nia ain fatin nudar Inan neebe diak sai ezemplu ba oan sira hotu,” tenik Amu Matias.
Nia hatete, iha nia vizita nee primeiru atu fo hanoin no fanu bá sarani sira katak, mahein ba Parokia Komoro nian mak Nain Feto Maria Auxiliadora, nee atu fo hanoin katak loron Parokia nian besik dadaun ona iha dia 24 de Maiu neeaibe tanba monu iha Domingu, sei halao iha Sabadu.
Tuir fali segundu mak mai vizita nia oan sira, neemak Nain Feto mai vizita iha Bairu BTN -3. Objetivu boot 2 neemak ohin Nain Feto hiit aan mai Bairu BTN 3 nian, mai haree no hodi fanu katak festa Parokia nian besik dadaun ona.
Sarani iha fatin nee labele toba demais no dok demais, nain Feto mai bolu ema idak-idak nia familia no bairu hodi hakbesik bá Inan ida.
Iha evanjelho ohin Sao João nian fo hanoin katak, tanba sa mak Nain Feto sai Ita Nia Inan, tanba Jesus rasik mak entrega Nia Inan bá eskolante neebe Nia hadomi mak Sao Joao. iha momentu neeba Sao João simu Nain Feto bá nia uma hodi sai Inan ida neebe tau matan ba eskolante sira hotu. Ho rajaun ida neemak ita hotu Jesus Nia eskolante hodi we batismu hodi sai Jesus Nia eskolante no apostlu, ho rajaun ida neemak Nain Feto sai Ita Nia inan hotu. So Ita la simu batismu no we batismu karik, Nain Feto la sai ita Nia Inan. Tanba we batismu Ita hotu sai Nain Feto nia oan sira hotu neebe nia hadomi. Tanba Ita hotu sarani, nain feto sempre tulun Ita. Iha momentu ida nee, loke fuan laran problema hotu bá Nain Feto, Nia sei responde bá Ita idak-idak,” dehan nia.
Nia haktuir, Santo sira hotu iha nia moris, lee no nonton sira hotu halo devosaun boot bá Nain Feto. Santo Ida neebe boot mak Santo Dom Bosco, nia dehan hatudu imi nia devosaun boot ba Nain Feto, imi sei haree saida milagre iha imi nia moris. Nia dehan hanesan nee, tanba akontese bá nia moris. Ho esperensia bainhira nia sei kiik, Nia Pai mate no Nia Inan kee rai deit labele sustenta Nia bá eskola, maibe ho Nia devosaun boot reza bá Nain Feto, ema riku sira ajuda nia tama bá semináriu too nia sai Padre.
Ho ida nee sarani Sira iha bairu BTN -3, hakbesik aan bá Inan Nain Feto, halo devosaun no hatoo problema hotu nian, fiar katak Inan sei responde ba imi ida-idak nia problema sira.
Sarani bairu BTN -3 simu Nain Feto Maria Auxiliadora husi bairu Rai Kotuk hodi mai kalan ida hamutuk ho sarani sira iha fatin nee. antes atu halo misa sarani sira sei rona uluk formasaun husi Madre Julia Amaral no Irma husi Ssps. Nain Feto hamutuk ho sarani sira durante kalan ida, sarani sira halo devosaun reza tersu, kanta no dansa husi kada grupu sira neebe iha bairu nee, nunee iha loron Sabado lori fali bá iha bairu BTN -2.
(dom)
