DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun, kondena arguidu inisial TS, hanesan seguransa iha Diresaun Nasional Seguransa Patrimoniu Publiku (DNSPP) ho pena suspensaun.
Iha sala julgamentu laran, Juiz prosesu Jose Escurial deklara katak, arguidu konfesa ba faktus neebe iha, katak arguidu foti duni sigaru.
Juiz deklara, provadu mos katak arguidu foti sigaru dala rua hodi ba faan, no momentu bolu arguidu presta deklarasaun iha Ministeriu Publiku, arguidu devolve ona osan sorin no hela sorin mak seidauk devolve.
Tanba nee ikus mai koletivu deside, aplika pena prizaun fulan 6 suspende ba tinan 1. No Tribunal mos fiksa katak, durante pena suspensaun tinan ida nia laran, arguidu tenke devolve fali osan US$ 150.
Tribunal mos esplika ba arguidu katak, durante periodu suspensaun nia laran se arguidu pratika fali krime seluk, mak Tribunal sei halo revogasaun, atu arguidu kumpri prizaun fulan 6 hodi hein julga ba prosesu foun.
Tribunal mos fo hanoin ba iha arguidu, la konkorda ho desizaun Tribunal nian, bele liu husi nia Defeza hodi halo rekursu ba iha Tribunal Rekursu.
Antes nee iha alegasaun Prokurador Pedro Baptista deklara, arguidu konfesa imparsial ba faktus neebe iha. Tanba nee husu Tribunal atu aplika pena suspensaun ba arguidu.
Enkuantu husi parte defeza nian, Defensor Publiku estajiadu husu Tribunal tetu deklarasaun sira hotu, hodi aplika pena neebe justu no adekuadu ba arguidu.
Iha indisus sufisiente katak, arguidu servisu nudar seguransa iha Tribunal Judisial Primeira Instansia Dili (TJPID) durante tempu naruk.
Iha loron Tersa 12 no iha loron 17 fulan Dezembru tinan 2023, entre tuku 21h17 to tuku 21h38, nia iha sala nº 54 TJPID.
Iha loron 03 fulan Outubru no iha fulan Dezembru tinan 2023, ofisial justisa ida konfirma katak, lakon sigaru barak ho marka Arrow, Surya no Joker, neebe rai hela iha sala nº 54, relasiona ho prosesu NUC 0052/19 (PCCIC), NUC 0023/22 (LIBZT), NUC 0092/23 (DIDIL), NUC: 0059/23 (PNSIC), NUC: 0009/23. LIMBR. Hamutuk pakote 156 (slof) mak lakon.
Sasin nee informa ba sekretaria, neebe kontaktu Polísia Investigasaun Kriminál (PCCIC) atu halo investigasaun no hare kamera vijilansia iha fatin.
Hafoin halo analiza ba kamera vijilansia, haree katak arguidu tama ba sala nº 54 TJPID nian, uza janela nudar fatin atu tama no sai, no foti sigaru.
Konsekuensia husi arguidu nia hahalok hamosu prejuizu ba Estadu ho total neebe seidauk sura, no kria difikuldade no ameasa ba realizasaun justisa.
Arguidu komete naok iha Tribunal, ho sasan neebe naok hanesan objetu apreendidus iha prosesu neebe lao hela iha Tribunal, neebe agrava situasaun, tanba viola seguransa no konfiansa ba sistema judisiariu.
Arguidu halo ho konxiensia, hatene katak nia konduta bandu no bele hetan kastigu penal, no tan nee bele hetan sensura.
Bazeia ba buat neebe temi iha leten, arguidu nia hahalok konfigura krime Furtu Agravadu, previstu iha artigu 252 husi Kodigu Penal.
Audensia julgamentu nee, prezide husi Juiz Kolektivu, Jose Escurial, Fransisca Cabral, Juiz estajiadu nain ida, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Jenini Daos.
(ter)
