DILI, STLTIMORLESTE.com – Hanesan nasaun dezenvolvimentu labele hakmatek deit iha rai laran, se hakmatek deit iha rai laran sei laiha impaktu pozitivu mai nasaun Timor Leste.
Liafuan nee haktuir husi Ministra Saude, Elia dos Reis Amaral, hodi hatan ba preokupasaun husi Membru Parlamentu Nasional, Bankada Partidu KHUNTO neebe husu Ministra Saude atu konsentra ba servisu no evita partisipa atividade sira neebe laos responsabilidade Ministeriu Saude.
Hanesan nasaun dezenvolvimentu labele hakmatek deit iha rai laran, maibe presiza estuda no halo interativu ba malu.
“Se hakmatek deit iha rai laran sei laiha impaktu pozitivu, no ita sei la hetan buat diak husi rai liur. Ita estuda halo interativu ba malu, atu nunee ita aprende husi rai seluk, lkus hodi implementa iha rai laran,” dehan nia ba STL iha Novo Turismu, Sesta (07/08/2026).
Nia haktuir, ida nee mak objetivu husi papel Miniisteriu Saude nian kuandu halo visita ba iha rai liur. Nunee mos iha rai laran, bainhira partisipa iha atividade sira tanba iha linha koordenasaun servisu interministerial.
Veteranu Pedro de Carvalho hatete, membru governu sira uza tempu barak liu hodi halo vizita no partisipa atividade oioin, maibe iha area neebe membru governu nee responsabilidade ba hasoru hela problema barak. Governante sira diak liu konsentra ba iha ida-idak nia servisu, atu nunee bele rezolve problema sira neebe mak povu iha nasaun nee infrenta. Atu nunee povu bele moris ho kontente, tanba sira nia governu la taka matan ba sira.
“Haree ba situasaun real, ita povu nee sei halerik hela kona ba aimoruk laiha, estrada neebe aat, pesoal saude neebe menus iha postu saude sira, ambulansia laiha no seluk tan. Maibe governu la fo atensaun seriu ba kestaun ida nee maibe lao fali ba atividade seluk neebe dala ruma la relevante ho sira nia servisu ka responsabilidade,” dehan nia.
Nia hatutan, husu ba governu atu hametin fiar neebe mak povu iha liu husi votus neebe sira fo, atu nunee labele husik povu nasaun ida nee moris iha triste no susar laran.
Entretantu, antes nee Membru Parlamentu Nasional husi Bankada Partidu KHUNTO, Irene Gonzaga Sarmento husu Ministra Saude (MS) atu konsentra ba servisu no evita partisipa atividade sira neebe laos responsabilidade Ministeriu Saude nian.
“Tuir lo-loos Ministra haree nia servisu halo, nia lalika presiza tuir demais Xefe Governu, Xefe Governu halo nia servisu, ida neebe laos asuntu saúde tuir loos la presiza Ministra ba,” tenik nia.
Nia dehan, Ministra tur hakmatek iha nia fatin hodi haree rezolve problema saude, se nia tun ba baze mos nia tun ba ida parte saude nian, no la presiza ba lansamentu estrada.
(dom)
