DILI, STLTIMORLESTE.com – Reprezentante povu iha Parlamentu Nasional (PN) husu governu liu husi Ministeriu Obras Publikas (MOP) no Ministreriu Agrikultura, Peskas, Pikuaria no Floresta (MAPFP) atu normaliza lalais bee ba natar iha Suku Baidubu, Postu Uatokarbau, Munisipiu Viqueque.
“Hau hakarak kolia lalais deit informasaun ida mai husi populasaun sira husi Uatolari neebe urjenti los, husu governu liu-liu MOP, MAPFP atu halo lalais normalizasaun ba natar Baidubu, tanba bee la iha,” hatete Deputadu Bankada FRETILIN, Dario Madeira iha ambitu debate orsamentu retifikativu, iha sala plenaria Parlamentu Nasional (PN), Tersa (02/06/2026).
Nia dehan, udan boot foin lalais akontese nee iha parte kostal sul maibe foin para semana ida deit hare neebe populasaun sira kuda foin semana rua deit mate hotu, tanba rai maran hotu, tanba bee la iha.
Tan nee nia husu MOP oriente ekipamentu husi Institutu Jestaun Ekipamentu Apoiu Dezenvolvimentu Infraestrutura (IGEADI) nebee oras nee halo hela normalizasaun estrada iha Uatokarbau, Munispiu Viqueuqe atu halo normalizasaun ba natar nee.
“Udan foin para semana ida deit hare neebe populasaun sira kuda atu mate hotu, imajen mak nee, populasaun sira foin manda mai, rai maran no nakfera hotu ona, no fo ameasa boot ba populasaun sira, tanba tinan nee sira labele koileta hare,” dehan deputadu.
Hatan ba preokupasaun nee, Ministru Agrikultura, Peska, Pikuaria no Floresta (MAPFP), Marcos da Cruz katak, MAPFP destaka ona ekipamentu pezadu ida iha Postu Uatolari, Munisipiu Viqueque, hodi halo normalizasaun ba irigasaun.
“Ita iha eskavador ida neebe oras nee destaka iha Uatolari hodi responde ba kestaun sira hanesan kee kanal ba natar sira neebe durante nee abandona deit, seluk mak udan boot neebe oras nee akontese, se mota tun mak taka bee dalan sira mak ekipamentu pezadu nee sei normaliza fila fali,” hatan Ministru Marcos.
Nia dehan, MAPFP laos destaka deit ekpamentu pezadu Postu Uatolari deit maibe destaka mos iha Suku Bahalarawain, Viqueque Vila, Seisal Munisipiu Baukau, Bobonaro, Kasa, Munisipiu Ainaro nomos Munisipiu Covalima hodi halo noramalizasaun ba irigasaun sira neebe hetan estragus husi mota.
“ita destaka eskavador iha fatin sira nee, neebe karik ita hetan informasaun katak kanu kotu iha fatin sira nee, liu loron ida ka rua hanesan nee, eskavador too kedas hodi halo normalizasaun,” adianta nia.
(alb)
