BAUCAU, STLTIMORLESTE.com – Natureza domina iha selebrasaun loron FALINTIL ba dala 51, neebe realiza iha Foho Matebian, Munisipiu Baucau.
Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” hateten, prosesu selebrasaun loron FALINTIL ba dala 51 iha foho Matebian lao ho diak, tanba kuaze diskursu sira neebe aprezenta inklui parada militar neebe akompanhamentu husi entidades sira iha seremonia refere lao diak, maibe akompanha ho natureza.
“Serimonia lao diak, maibe anin mak makaas desde tenda sira nee ita halo sira sobu, maibe seremonia hotu nia natural fali hanesan, neebe natureza nee sempre hanesan nee,” hateten Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek” hafoin remata seremonia komemorasaun loron FALINTIL ba dala 51 iha foho Matebian, Kinta (20/08/2026).
Nia rekoinhese, durante prosesu soremonia ofisial hahu no aprezentasuan diskursu sira lao bainaka sira tuur deit iha loron manas, tanba tenda neebe prepara ba bainaka sira atu tuur, kuaze anin sobu hela deit, nunee bainhira seremonia lao laiha tenda ba bainaka sira, maibe sira tuur ho diak iha fatin seremonia.
Nia sublina, durante diskursu lao mosu akompanha ho anin neebe la fo biban, maibe bainhira seremonia ofisial remata, anin moos hahu para ho signifikante.
“Hau hanoin nee hanesan ita hakoi mate ida mos ema haklalak tanis barak, apalagi ita halo seremonia ida ba ema mate rihun ba rihun husi Indonezia Timor oan neebe mate barak, nee nia klamar hotu hotu haklalak tanis hanesan nee, neebe ida nee ita hein sai matak malirin mai ita,” Falur akresenta.
Falur deskonfia, anin neebe mosu iha seremonia refere mak klamar husi eroi no eroina sira neebe lakon vida ba luta libertasaun Nasional, neebe Estadu Timor-Leste sei haluhan, tanba seidauk fo rekoinhesementu no hatur sira iha fatin dignu.
(tom)
