BAUKAU, STLTIMORLESTE.com – Negosiante sira iha merkadu foun Tuanau, sente Autoridade Munisipiu Baukau sulan sira iha rai rahun laran.
Deklarasaun nee hatoo husi Negosiante Sembaku, Rosa Juliana Soares ba STL iha Merkadu Tuanau, Sesta (29/11/2024).
“Iha nee ami simu rai rahun la rega, tanba bee laiha sente sulan ami iha rai rahun laran, iha merkadu,” nia hatete.
Autoridade Munisipal hahu muda negosiante sira husi merkadu tuan Vila Nova ba merkadu foun Tuanau, iha loron 19-23 Novembru 2024 no dadaun negosiante sira faan ona sira nia sasan iha merkadu refere, maibe kondisaun rai mutin neebe ateru tuir estrada iha merkadu refere, fo impaktu ba sira nia sasan, tanba movimentu barak hamosu rai rahun suar makaas.
Nia haktuir, durante loron hirak nia laran rai rahun nia suar fo impaktu tebes ba sira nia sasan no saude, tanba laiha bee moos iha merkadu refere atu kombate rai rahun nia suar.
Negosiante nee triste ho kondisaun merkadu refere, tanba estrada aat no hamosu rai rahun barak, nunee habaruk sosa nain sira hodi hakat ba too sira nia fatin sosa sira nia sasan.
Iha sorin seluk negosiante roupa loja, Cedelizio Baptista Freitas Fraga sublina, merkadu refere hetan kanalizasaun bee moos husi BTL E.P, maibe la sufisiente, tanba kada semana fo asesu deit ba negosiante sira iha merkadu refere dala 2, maibe la too oras 3 nunee difikulta tebes sira nia sasan neebe besik iha estrada tenke falun ho rai rahun.
“Memang afeta duni ami nia sasan, roupa sira ami faan la diak, tanba rai rahun tama, tanba estrada tama sai jalur ida deit,” tenik Cedelizio.
Nia husu Autoridade Munisipiu Baukau, atu reabilita estrada iha merkadu refere, nunee bele fasilita movimentu transporte sira tama no sai labele hamosu rai rahun hodi fo impaktu ba sira nia sasan.
Too notisia nee Publika, STL seidauk halo konfirmasaun ho parte Autoridade Munisipiu Baukau.
(EST 2)
