AMBENO, STLTIMORLESTE.com – Komandante Polisia Nasional Timor Leste (PNTL) Rejiaun Administrativa Espesial Oecusse-Ambeno (RAEOA), Superintendente Xefe Polisia, Nicolau Francelino da Costa deklara, situasaun seguransa iha Oecusse dezde uluk too ohin loron kontroladu, tanba nee husu ba publiku atu labele koko kria instabilidade ho rumoris oi-oin dehan naok ten, kalan hafuu ema nunee finji duni malu iha tempu kalan.
“Hau atu informa ba publiku katak, relasiona ho situasaun seguransa neebe mak durante nee lao iha RAEOA, situasaun seguransa lao diak, la iha problema, tanba ita haree atividades igreja ninian iha Oecusse, lao diak teb-tebes, bazeia ba karta pedidu husi parte Igreja Parokia Nossa Senhora do Rosario Oecusse, neebe haruka mai Komandu PNTL RAEOA, sempre koordena no envia ba operasaun seguransa hodi trasa planu operasaun seguransa, atu akompanhia atividades relijiozu atu lao diak iha Oecusse, tanba nee nuudar komandante PNTL RAEOA, apela ba publiku, liu-liu iha Oecusse katak, naok ten komesa tama uma, sai uma, naok ema nia sasan, informasaun sira nee laloos ida,” dehan Komandante PNTL RAEOA, Superintendente Xefe Polisia, Nicolau Francelino da Costa ba STL iha Komando PNTL Oecusse, Bairu Santa Rosa, Suku Costa, Postu Administrativu Pantemakassar RAEOA, Segunda (15/06/2026).
Nia haktuir tan katak, sei sidadaun sira kontinua lansa informasaun falsu sira nee, diak liu hanoin didiak, tetu didiak.
“Ita lalika espalha fali informasaun sira neebe ke laloos, informasaun sira neebe ke la justu ba ita nia komunidade sira, nee signifika ita la kontribui, la kopera ba estabilidade no trankuilidade publiku iha Oecusse, tanba nee hau nuudar komandante PNTL iha Oecusse hakarak apela deit ba publiku, husu ba komunidade sira atu hatoo informasaun neebe loos, justu ba publiku, labele naran inventa tunsae, tanba ninia impaktu nee halai liu ba situasaun seguransa, ida nee ladun diak hodi koresponde situasaun iha Oecusse,” dehan nia.
Antes nee, Amo Vigariu Parokia Nossa Senhora do Rosario Oecusse, Pe. Florindo de Jesus iha Igreja Tuan Santo Antonio Oecusse bain hira prezide Misa preokupa ho informasaun falsu sira neebe lansa iha Bairru Nunbei too masin, kalan-kalan joven no povu duni ema naok ten.
“Husu ba sarani sira atu tuur hakmatek iha uma, labele lansa informasaun oi-oin dehan naok ten sobu ema nia uma, neebe kalan-kalan sempre duni malu, ida nee ladun diak, tuur hakmatek iha uma,” dehan nia.
Tuir observasaun STL, relasiona ho rumoris oi-oin iha Oecusse kona ba naok ten, komandu PNTL RAEOA sempre lao kalan hodi observa situasaun seguransa iha Oecusse, tanba nee too ohin loron sedauk kaer toman ema neebe naok sasan no situasaun seguransa iha Oecusse lao hakmatek.
(jos)
