AMBENO, STLTIMORLESTE.com – Relasiona ho lutu nasional iha nasaun Timor Leste (TL), Komandante Komando Polisia Nasional Timor Leste (PNTL), Rejiaun Administrativa Espesial Oecusse-Ambeno (RAEOA), Superintendente Xefe Polisia, Nicolau Francelino da Costa husu ba povu Oecusse labele toka muzika iha fatin publiku ho Microlet, Angguna, Tum-Tum, tenke fo menutu ida silensiu hodi presta omenajen ba Saudozu Eis Gerileru, Eis Prezidente Parlamentu Nasional dahuluk, Eis Prezidente Republika atual Prezidente Partidu FRETILIN.
Tuir Komandante Komando PNTL RAEOA, Superintendente Xefe Polisia, Nicolau Francelino da Costa ba STL iha Sede Partidu FRETILIN bairru Sikluli, Aldeia Sanane, Suku Costa, Postu Administrativu Pantemakassar RAEOA, Kinta (25/06/2026) dehan, nia orienta ona membru PNTL hodi avizu ba publiku iha Oecusse, atu labele barulhu no toka muzika utiliza transporte hanesan Tum-Tum, Mikrolet, Angguna no transporte sira seluk-seluk tan.
“Iha loron hirak liu ban, hau orienta ona ba membru PNTL avizu ona ba publiku hotu iha Oecusse kompostu husi povu iha Postu Administrativu Pantemakassar, Nitibe, Oesilo no Pasabe, atu labele barulhu no toka muzika, liu-liu ba transporte publiku hanesan Microlet, Tum-tum, Angguna no transporte selu-seluk tan, ita tenke fo menutu ida silensiu hodi presta omenajen ba ita nia aman Eis gerilheru, Eis Parlamentu Nasional Primeiru, Eis Prezidente da Republika atual Prezidente Partidu FRETILIN neebe hakotu ona ninia peregrinasaun iha mundu, governu liu husi Konselhu Ministru dekreta ona Lutu Nasional, povu hotu-hotu iha nasaun TL, liu-liu povu Oecusse, tenke hakmatek no presta omenajen,” dehan nia.
Iha oportunidade hanesan, Komisaun Politika Partidu FRETILIN iha RAEOA, Domingas Sufa observa iha Oecusse, hatudu katak povu iha rai ketan Oecusse, kumpri duni orientasaun no dekreta Lutu Nasional husi Konselhu Ministru, povu Oecusse kumpri duni, la toka musika no barulhu.
“Hau nia observasaun iha Oecusse, durante maktoban, Saudozu Francisco Guterres Lu Olo, hakotu iis iha Malazia, povu Oecusse la iha barulhu no toka muzika, maske dadaun kopa mundial povu hakmatek no kumpri Konselhu Ministru neebe dekreta Lutu Nasional ema hotu-hotu laos deit iha Oecusse maibe TL laran tomak, la halo barulhu,” dehan nia.
Iha biban nee, Domingos Elu nuudar povu Oecusse sente lakon aman domin nain neebe oferese ninia aan ba rai doben ida nee husi ai laran, too ukun rasik aan. Tanba nee husu ba povu Oecusse oan tomak, atu fo netik tempu menutu ida fo omenajen ba aman lutador ba rai doben TL maka ohin goja ona independensia.
“Hau nuudar povu kiik ida iha rai ketan Oecusse, sente lakon aman domin nain ida neebe oferese ninia aan tomak iha tempu luta too ukun rasik aan, tanba nee husu ba Atoni oan sira hotu, atu tuur hakmate no respeita ordem governu neebe dekreta lutu nasional, hotu-hotu tuur hakmatek hodi akompanhia cadaver Saudozu Francisco Guterres Lu Olo neebe sei iha ninia residensia Farol Dili, labele toka muzika no barulhu tanba avizu nee fo sai ona atu labele barulhu,” dehan nia.
Tuir observasaun STL iha Oecusse, povu barak maka iha konsensia, la barulhu no la toka muzika, povu Oecusse organiza malu liu husi instituisaun governu no instituisaun privadu sira, sempre ba presta omenajen ba Saudozu ninia imajen neebe tau iha meja iha Sede partidu FRETILIN nian iha Bairru Sikluli Oecusse.
(jos)
