DILI, STLTIMORLESTE.com – Oras nee daudaun numeru Defensor Publiku hamutuk 38 deit, tanba nee konsidera seidauk sufisiente.
“Defensor Publiku estajiadu nain 4, sura ho sira nain 4 hamutuk 38, neebe balu destaka ba iha Oecuse, Baucau no Suai,” dehan Defensor Publiku Jeral, Cansio Xavier ba STL iha Kaikoli, Segunda (18/05/2026).
Nia hatutan, iha Dili hamutuk nain sanulu resin sia (19), tanba haree ba sentru ho populasaun neebe barak, numeru kazu mos barak.
Nia esplika, iha Oecusse Defensor Publiku nain 3 mak destaka iha neeba, iha Baucau nain 5, no iha Suai nain 2 hodi akompanha prosesu sira neebe julga iha neeba.
Defensor Publiku hanesan Instituisaun Estadu, tenke servisu ho profisional, tanba nee sei la tolera kuandu simu informasaun husi publiku sira konaba atendementu balu lalos husi Defensor Publiku sira.
Iha fatin ketak, Akademiku Simiao Ribeiro dehan, presiza aumenta numeru DP, tanba sira nia knar importante tau matan ba dadur sira.
“Hanioin presiza aumenta numeru DP, atu nunee bele apoiu tulun ema neebe buka justisa, iha julgamentu sira,” dehan nia.
Hatutan tan, papel Defensor Publiku nian importante tebes, defende ema neebe buka justisa, tanba nee presija aumenta numeru Defensor Publiku atu kobre ba iha Tribunal no responde ba ezijensia publiku nian.
(ter)
