DILI, STLTIMORLESTE.com – Relasiona ho Obralan (OB) iha merkadu nasional, liu-liu iha Taibesi no Manleuana rendimentu diak, tanba loron boot natal no tinan foun besik ona.
Dehan Negosiante Atanazia Varela ba STL iha Merkadu Taibesi, Sesta (29/11/2024).
“Ami hanesan negosiante neebe faan Obralan (Second Clothes) iha merkadu Taibesi no Manleuana, kuandu loron boot besik ona, entaun rendimentu ka reseitas tama diak, loron ida hetan US$ 200 ba leten, maibe kuandu loron baibain, dala balun hetan oituan deit US$ 50,” dehan Negosiante nee.
Tuir Negosiante nee, nuudar negosiante sente kontente ho servisu ida nee, biar dezafius barak no prosesu naruk hafoin hetan osan, maibe nuudar bussines-women ida, lori ida nee mak bele fo seguransa ba nesesidade uma laran nian.
Sasan ka obralan sira neebe lori mai faan, ba sosa tutan fali iha kompanhia sira neebe importa ropa mai iha Timor Leste, no ba sosa tutan ho montante saku ida US$ 90 mai faan fali iha merkadu sira, hetan pursentu US$ 200 ba leten, entaun husi servisu ida nee bele fo sustentabilidade ba uma laran nian.
Iha parte seluk, Negosiante iha Merkadu Manleuna, Joana dos Santos Tavares afirma, sasan ka obralan neebe faan iha merkadu sira, kuandu loron boot besik ona, nee rendimentu diak, maibe kuandu loron baibain nee rendimentu depende ba ema sosa.
Tanba obralan sira neebe faan iha merkadu sira, kuandu loron boot ona, komprador tama barak, entaun reseitas sira mos tama ho diak, sasan sira neebebfaan nee mos depedende ba ema sosa, dalaruma loron ida hetan US$ 150 ba leten, maibe kuandu ema sosa laiha hetan deit, US$ 75 ba leten ka loron.
“Ami hanesan negosiante obralan iha merkadu Taibesi no Manleuana nian, sente kontente ho moris ba halo business ida nee, tanba husi nee mak ami bele hetan osan hodi sustenta ba preokupasaun uma laran, no mos suporta ba oan sira nia prosesu estadu,” nia sublina.
Entretantu Jestor ba Merkadu Manleuana, Carlos Fernandes afirma, negosiante sira nee faan sasan no obralan iha merkadu Manleuana tantu iha Taibesi, organiza oinsa atu sira bele faan ho organizadu, nunee labele kria engrafamentu oinoin iha merkadu sira.
Negosiante sira faan sasan hanedan obralan ho modo sira faan hamutuk, tanba fatin ba sira kloot, entaun laiha espasu ba sira atu faan, nunee hanesan jestor ba merkadu sira, nafatin organiza negosiante sira, hodi faan tuir formatura, mesmu faan sasan ho misturas, maibe importante mak faan tuir espasu neebe iha.
(EST 1)
