DILI, STLTIMORLESTE.com – Governu presiza aloka Orsamentu Jeral Estadu (OJE) 2025 barak ba iha setor edukasaun, saude no agrikultura atu povu bele hetan benefisiu.
Kestaun nee hatoo husi Prezidente Konselhu Diretoria Rede Feto Timor Leste, Zelia Fernandes ba STL iha nia knaar fatin Segunda (28/10/2024).
Nia hatete, tuir sira nia haree povu sei preokupa kona-ba irigasaun, inklui sala de aula menus nomos aimoruk laiha, tanba nee mak husu ba Governu diak liu tau osan ba setor tolu nee hodi bele hadia.
“Hau hanoin Orsamentu Jeral Estadu 2025 nia agora tama ona ba prosesu audensia iha Parlamentu Nasional ho lina Ministerial sira atu hatete katak setor produtivu sira neebe mak iha ninia orsamentu nee la atinji 10%, porzemplu setor edukasaun nia dezde uluk too ohin loron ninia porsentu nee 10% nia okos la sae, nunee mos iha area saude no agrikultura,
Prezidente Rede Feto nee dehan, linas Ministerial sira neebe mak bele fo retornu ba estadu no povu maibe setorais sira nee la tau osan boot ho nunee sei afeta.
Nia preokupa ho ida nee, sira haree husi diskusaun neebe mak halo iha munisipal problema barak iha infraestrutura eskola menus kadeira meza, menus aimoruk no mediku menus no irigasaun barak la hadia, tanba nee mak husu tau osan neebe mak masimu ba setor edukasaun, saude no agrikultura.
“Presiza iha balansu ho politika fiskal neebe Governu iha para oinsa halo balansu ba preokupasaun hotu pelumenus bele rezolve ba iha preokupasaun neebe mak komunidade iha, ezemplu iha area edukasaun nia ita haree katak maioria edifisiu neebe iha munisipiu barak husi Indonezia nia tempu tinan barak ona seidauk reablita balun halo tan edifisiu maibe sala rua ou tolu deit, la liu husi ida nee, entau sala de aula nee kontinua menus, saida mak politika fiskal tenke responde tau osan hodi hadia kestaun sira nee hotu, meza kadeira sei menus, tau osan para responde ba meza kadeira, labele tinan bailoron mak hakilar hela deit meza kadeira sala de aula menus,” katak nia.
Nia haktuir tan katak ho preokupasaun neebe mak iha nafatin sai preokupasaun, politika fiskal halai ketak preokupasaun ema nia halai ketak, nomos kona-ba merenda eskolar nia objetivu ida mak aumenta nutrisaun ba labarik sira nia maibe merenda eskolar sai fali hanesan projetu ladun responde diak ba nutrisaun ba labarik nia saude tanba modo balun fo fali hahan importasaun.
Nunee mos akademista husi UNTL, Judite Ximenes hatutan,tuir nia hanoin orsamentu nee diak liu aloka barak ba setor Edukasaun, Saude no Agrikultura.
“Hau nia hanoin nee orsamentu nee diak liu tau prioridade nee ba iha setor edukasaun tanba kualidade edukasaun nee defende ba profesores, kualidade profesores defende ba laboratoriu no defende mos ba fasilidade no seluk tan, nomos iha area saude mos hanesan presiza hadia iha imfraestrutura, presiza aumenta rekursu humanu liu liu doutor sira, parteira no sosa aimorok, nomos iha setor agrikultura mos presiza tau prioridade para hasae produsaun iha rai laran nunee lebele depedensia ba hahan importasaun,” katak nia.
(eme)
