DILI, STLTIMORLESTE.com – Bankada opozisaun husu governu atu fo klarifikasaun kona-ba komunidade sira neebe hetan eviksaun, maibe seidauk hetan indemnizasaun husi governu.
Deputadu Bankada FRETILIN, Joaquim dos Santos hateten, governu presiza fo klarifikasaun ba publiku, tan sa mak Vitima sira neebe hetan eviksaun iha Dili seidauk hetan direitu indemnizasaun ba rai privadu sira.
“MOP fo ona Indemnizasaun ba uma kain hira, hau hatene katak barak seidauk simu,” Deputadu Bankada FRETILIN, Joaquin dos Santos Boraluli iha ambitu debate orsamentu retifikativu 2026 iha sala plenaria PN, Segunda (01/06/2026).
Nia dehan, rai estadu nee bele diskute maibe ema nia rai privadu nee presiza fo indemnizasaun tanba ema iha dokumentu komprovativu sira maibe sofre ba dezenvoilvimentu ida nee.
Nia akresenta, populasaun sira durante nee kontribui tebes ba dezenvolvimentu, tan nee governu presiza tau konsiderasaun direitu ba vitima eviksaun.
“Populasaun sira la rezeita dezenvolvimentu mais sira mos labele lakon sira nia direitu hanesan sidadaun ida iha rai nee, tan nee hau husu presiza halo esklarisimentu
Fatin hanesan, Deputada Bankada Partidu Libertasaun popular (PLP), Maria Angelina Sarmento husu governu atu fo lalais indemnizasaun ba populasaun sira neebe hetan eviksaun iha alargamentu estrada iha kapital Dili no Munisipiu sira seluk.
“Fatin sira oras nee sobu hotu ona nee, indemnizasaun ba populasaun nee oinsa, se ita dada bebeik kuitadu sira la iha serteja ba sira nia fatin seguru atu sira bele hela ba, tanba iha fatin balun nee uma hetan destroi kompletamente 100%, sira la hatene atu ba hela iha neebe,” dehan nia.
Hatan ba kestaun nee, MOP, Samuel Marca hatete, governu orsamentu fo ona indemnizasaun ba uma kain rihun neebe sofre eviksaun iha kapital Dili.
“Ita halo eviksaun lubuk ida iha Dili laran inklui iha Munisipiu Baukau, ita selu ona familia hamutuk 1.370 ho orsamentu milhões UU$ 9.500,099,306,” hatan Ministru Samuel.
Nia dehan, uma kain balun seidauk hetan indemnizasaun tanba presiza halo negosiasaun liu husi dialogu neebe iha, tanba uma kain balun husu atu hasae tan osan, maibe sei halo pagamentu bazeia ba tabela neebe prepara ona.
“Ita iha ona tabela ida neebe sei uza hodi halo diskusaun, depois kuandu konkorda malu ita sei asina ona mak sei hahu poagamentu,” dehan nia.
Governante nee mos apresia tebes ba komunidade neebe hahu kontribui iha prosesu alargamentu estrada tanba idak-idak hahu sobu nia uma rasik maske seidauk hetan indemnizasaun husi governu.
“Komunidade balun ita foin temi atu halo eviksaun, sira sobu uluk ona, ita dehan hein lai oituan selu tiha lai mak sobu, maibe sira dehan lae, ami sobuk uluk ona tanba ami iha fatin seluk atu muda, depois mak ita buka malu hodi selu tuir buat neebe tekniku sira levanta hotu ona,” apresia nia.
(alb)
