DILI, STLTIMORLESTE.com – Komandante Munisípiu Dili, Komisáriu Asisténte Polísia Orlando Gomes hatete, relasiona ho eviksaun neebe akontese iha Aimutin, membru polisia nia prezensa iha fatin eviksaun atu asegura, nunee labele akontese konflitu no krime entre governu ho komunidade.
Nia dehan, Komando Polisia Nasional Timor Leste (PNTL) simu pedidu husi Sekretàriu Estadu Terras Propriadade (SETP) hodi ba asegura fatin para halo eviksaun ba uma kain 25 iha Aimutin.
Tanba nee polisia ninia prezensa iha fatin eviksaun nee para asegura atu nunee parte rua labele hamosu konfilitu ou krime ruma iha fatin eviksaun nomos polisia la uza atuasaun uza forsa neebe masimu, maibe uza Deit minimu.
“Hakarak fo hatene ba publiku katak, ita mos iha vidio wainhira halo atuasaun neebe mak iha, ita la halo atuasaun uza forsa neebe masimu, maibe ita uza deit minimu, primeiru proteje ba ama ferik ida neebe mak atu tama ba iha exkapator, depois oan sira dada mai polisia mos ba asegura hodi lori ba fatin neebe seguru, depois sira neebe mak halo impedimentu ruma polisia tenta nafatin hodi asegura, polisia lori ba kareta para ita bele halo identifikasaun,” hatete Komandante Munisípiu Dili, Komisáriu Asisténte Polísia Orlando Gomes ba jornalista sira iha Eskuadra Dom Aleixo, Segunda (18/05/2026).
Nia esplika, membru polisia nia prezensa iha Aimutin para asegura, sei iha fatin eviksaun iha atuasaun ruma mak ladiak bele hatoo keixa iha Komando PNTL para Komando bele verifika no halo prosesu hodi hatene lo-loos ba atuasaun neebe akontese iha terenu.
Nia informa, atuasaun membru polisia nian neebe mak iha eviksaun ba komunidade Aimutin ida nee halo atuasaun para labele iha konflitus.
“Loos duni kestiona makaas husi instituisaun barak ba atuasaun polisia nian, mais kuandu iha operasaun ruma, kuandu halao ezekuasaun ba eviksaun instituisaun relevante halo monitorizasaun mai iha fatin para akompanha mos servisu PNTL nian nomos SETP atu nunee labele haree deit iha Facebook ema edit rohan rohan depois ita akuza ona ita nia membru polisia sira, maibe kuandu atuasaun ruma tenke prosesu mak ita haree lia los nee, labele julga kedas iha publiku katak membru polisia sira hatudu hahalok hanesan nee,” nia koalia.
Iha fatin Komunidade Aimutin, Alito Ximenes hatutan, atendimentu PNTL nian ba komunidade la baku no la tuku, maibe sira mai dudu no hakalma komunidade sira neebe senti triste no laran moras tanba Governu mai sobu uma neebe durante halo ho kosar been.
“Polisia nia perzensa iha fatin eviksaun la baku ami, maibe hodi asegura ami, tanba ami triste no laran moras ami mak hakilar fali Sekretàriu Estadu Terras Propriadade mai obrigatoriu hasai ami uma kain 25, tanba nee polisia mai halo atuasaun no asegura ami,” nia afirma.
(jen)
