DILI, STLTIMORLESTE.com — Orsamentu Jeral Estadu (OJE) 2027 ho US$ 2,568 billiaun boot tebes, maibé povu sei hein atu haree mudansa konkretu husi osan públiku ne’e.
Proposta orsamentu ne’e sai iha tempu Governu kontinua buka dalan atu hametin ekonomia, hadi’a servisu públiku no hamenus dependénsia ba Fundu Petrolíferu.
Montante US$2,568 billiaun ne’e sei suporta programa no atividade Governu, inklui gastu administrativu, infraestrutura, servisu públiku no dezenvolvimentu setór produtivu.
Maibé, boot liu orsamentu la signifika automaticamente mudansa ba moris povu, liuliu se alokasaun ba setór produtivu seidauk fó rezultadu ne’ebé visível.
Observadór Ekonomia, Fernando da Costa, kritika proposta OJE 2027 tanba konsidera prioridade orsamentu seidauk reflete nesesidade ekonomia reál no situasaun povu.
Nia dehan orsamentu boot tenke lori mudansa konkretu ba Agrikultura, Turizmu no setor produtivu sira ne’ebé bele kria empregu no hasa’e produsaun lokal.
“Orsamentu boot tenke lori mudansa ba povu; la’ós de’it aumenta gastu administrasaun no sustenta máquina estadu.”dehan Fernando ba STL, iha Largo Licidere, Dili, Kuarta (07/10/2026).
Fernando hateten Governu presiza aumenta investimentu iha irrigasaun, teknolojia, infraestrutura no asesu merkadu, hodi ajuda to’os-na’in sira hasa’e produsaun.
Ba Turizmu, nia husu investimentu ba infraestrutura bázika no promosaun destinasaun, tanba setór ne’e iha potensial atu kria empregu no aumenta rendimentu.
Nia mós alerta katak, dependénsia ba Fundu Petrolíferu sei difisil hamenus, se orsamentu nasional la fó prioridade ba diversifikasaun ekonomia no produsaun lokal.
Iha parte seluk, Akademista Universidade Nasionál Timor Lorosa’e (UNTL), Alarico de Araújo, hateten orsamentu boot tenke fó impaktu ba rekursu umanu no infraestrutura bázika.
Alarico konsidera edukasaun, saúde no dezenvolvimentu kapasidade juventude hanesan área importante atu asegura mudansa sustentável iha futuru nasional.
“US$ 2 billiaun resin sei iha valor se uza ho di’ak hodi hadi’a edukasaun, saúde no kapasidade rekursu umanu nasional.” dehan Alarico.
Nia husu Governu no Parlamentu Nasionál atu hametin fiskalizasaun, transparénsia no responsabilidade iha utilizasaun orsamentu públiku.
Entretantu Proposta OJE 2027 ho montante US$ 2.568.500.000 submete ona husi Governu ba Parlamentu Nasionál atu hetan apresiasaun, debate no aprovasaun.
(car)
