DILI, STLTIMORLESTE.com – Liu husi workshop ida mak oportunidade atu haree klean katak, padraun kualidade sira neebe dezenvolve ona bele implementa duni iha realidade Timor Leste nian, no bele responde ba nesesidade saude povu nian tuir kontestu sosial, ekonomiku, jeografiku no kultura neebe iha.
Liafuan nee haktuir husi Ministru Saude em Ezersisiu, Atual Visi Ministru Fortalesimentu Institusional Saude, José dos Reis Magno, liu husi nia diskursu iha ambitu abertura workshop kona-ba “Diseminasaun Padraun Kualidade Kuidadu Saude Nasional Timor Leste neebe halao iha Salaun Tokodede, Likisa, Tersa (23/06/2026).
Visi Ministru nee hatete, objetivu jeral husi workshop ida nee mak atu sosializa, valida no hametin komprensaun kona-ba diseminasaun padraun kualidade kuidadu saude nasional Timor Leste, no buka dalan diak atu garante nia implementasaun efetiva iha fasilidade saude hotu iha rai laran.
Workshop ida nee laos atu diskute teoria deit, ida nee mak oportunidade ida atu haree klean katak padraun kualidade sira neebe dezenvolve ona bele implementa duni iha realidade Timor-Leste nian, no bele responde ba nesesidade saude povu nian tuir kontestu sosial, ekonomiku, jeografiku no kultura neebe ita iha, dehan Governante nee liu husi karta komunikadu neebe diariu nee asesu husi media MS, Kuarta (24/06/2026).
Nia hatete, workshop ida nee importante tebes ba fortalesimentu sistema nsional saude padraun sira nee dezenvolve bazeia ba dominiu fundamental tolu mak estrutura, prosesu, rezultadu (outcomes). Padraun sira nee kompostu husi subdominiu 22, standard 144 no kriteriu avaliasaun 577, neebe sai hanesan referénsia no matadalan importante ida atu orienta, monitoriza no sukat kualidade servisu saude neebe fornese iha fasilidade saude hotu iha pais nee.
Nia afirma, dokumentu ida nee aprovadu ona husi MS iha tinan hirak liuba, maibe too agora nia implementasaun seidauk atinji rezultadu neebe espera. Durante períodu nee seidauk iha evidensia no relatoriu komprensivu neebe hatudu progresu implementasaun iha nivel nasional. Tanba nee, workshop ida nee importante tebes atu halo reflesaun hamutuk, identifika dezafiu sira neebe eziste no buka solusaun pratika atu garante implementasaun efetiva iha futuru.
Iha kontestu nee MS, liu-liu husi Gabinete Etika, Deontolojika no Garantia Kualidade (GEDGQ) no Departamentu Seguransa no Kualidade Saude (SSA), iha responsabilidade importante atu lidera, koordena no garante implementasaun padraun sira nee iha unidade no estabelecimentu saude hotu iha nasaun nee.
“Ita mos hatene katak susesu husi inisiativa ida nee depende tebes ba komitmentu no lideransa husi jestor no profisional saude sira neebe agora dadaun partisipa iha workshop ida nee. Kada partisipante iha papel importante atu asegura implementasaun padraun sira nee iha nia instituisaun no servisu rasik, hau mos hakarak agradese ba partisipante sira hotu neebe mai husi instituisaun no servisu oioin iha MS hanesan INSPTL, KSP, Diretores Jerais, Diretores Nasionais, Diretores Servisu Saude Munisipal, Diretores Ezekutivu Ospital, parseiru dezenvolvimentu no ajensia sira neebe marka prezensa iha workshop ida-nee. Ita espera katak diskusaun no reflesaun sira durante workshop nee bele ajuda identifika solusaun prátika ba dezafiu sira neebe eziste iha fasilidade saude sira, hodi hasae kualidade prestasaun kuidadu saude no mos prepara diak liutan ba kriasaun komite kualidade no akreditasaun iha fasilidade saude sira iha TL,” nia tenik.
Hakarak enkoraja partisipante sira hotu atu partisipa ho ativa iha sesaun servisu sira, fahe esperiénsia, koñesimentu no rekomendasaun sira. Ho nunee bainhira workshop remata, partisipante sira bele fila ba sira-nia instituisaun ho koñesimentu, kapasidade teknika no responsabilidade neebe diak liutan atu lidera no apoia implementasaun Padraun Nasional Kualidade Kuidadu Saude nian.
Rezultadu husi workshop neemak partisipante sira bele hetan koñesimentu, kompetensia no instrumentu nesesariu sira atu suporta implementasaun Timor Leste National Healthcare Quality Standards iha sira-nia instituisaun, hodi kontribui ba fortalesimentu sistema nasional saude no melhoramentu kontinuu ba kualidade servisu saude neebe fo ba povu TL.
(dom)
