BAUCAU, STLTIMORLESTE.com – Padre Agostinho da Costa hakotu iis iha Hospital Rejional Eduardo Ximenes (HoREX) Baucau, tanba sofre moras fuan no fator idade.
Bispu Diozese Baucau, Dom Leandro Maria Alves aprezenta, matebian Padre Agostinho da Costa hahu moras iha fulan Outubru tinan 2025 too iha tinan 2026 no iha loron 02 Junhu 2026 matebian Padre Agostinho da Costa sente kondisaun labele nunee lori ba Hospital Rejional Eduardo Ximenes (HoREX) Baucau, maibe la konsege salva vida, iha neebe matebian Padre Agostinho da Costa hakotu iis iha loron 03 Junhu pur-volta tuku 06:00 dader.
“Padre moras lo-loos nee mak ita haree katak nia halo operasaun ba nia fuan, ida nee mak kontinua too agora, depois ita haree nia idade nee mak afeta,” hateten Bispu Dioseze Baucau, Dom Leandro Maria Alves ba jornalista sira iha Vila Antiga Baucau, Kuarta (03/06/2026).
Bispu Dioseze Baucau nee konsidera, Padre Agostinho da Costa nia mate tristeza ba Dioseze Baucau no uma kreda Katolika iha Timor, tanba lakon bibi atan diak ida neebe mak ezemplu fiar nian no fo sasin hodi haklaken Maromak nia liafuan ba sarani sira iha tempu difisil nia laran.
Tanba nee Bispu Dioseze Baucau husu sarani sira atu hotu-hotu reza hasae orasaun ba Maromak iha momentu nee, hodi Maromak simu no perdua matebian Padre Agostinho da Costa iha Maromak nia kadunan santo.
“Ita agradese ba Maromak tanba fo nia bibi atan ida nee mai ita, agora nia fila hikas ona, ita reza nafatin atu fini sira neebe amu Agostinho kari durante nee bele buras liu tan,” Katak Dom Leandro.
Entretantu Dioseze Baucau deside sei haloot kadaver matebian Padre Agostinho da Costa iha loron 05 Junhu 2026, iha semeteriu padre sira nian iha Vila Nova Baucau.
Atual matebian nia kadaver rai iha nia rezidensia privadu Suku Bahu, Postu Administrativu Baucau Vila, Munisipiu Baucau.
Matebian Padre Agostinho da Costa moris iha loron 10 Maiu 1945, iha Munisipiu Baucau, oan husi Inan Maria Jacinta da Costa no Aman José da Costa, matebian nuudar oan dalima husi maun alin nain 8, neebe simu saserdotal sai Amu lulik iha loron 22 Agostu 1971 no hakotu iis iha loron 03 Junhu 2026 ho idade 81.
(tom)
