DILI, STLTIMORLESTE.com – Prezidente Republika (PR), Jose Ramos Horta hatete, iha loron hirak nia laran Palasiu Prezidensial transforma ba fatin enkontru konaba desportu, kultura, invosaun no kreatividade.
Prezidente Republika Jose Ramos Horta hatoo lia hirak nee liu husi nia diskursu iha okaziaun abertura Dili Internasional Marathon 2026 DIM ou semana matak iha Jardin Palasiu Prezidensial Nicolau Lobato, Bairo Pite, Kinta kalan (06/08/2026).
“Durante loron hirak nee, jardín sira Palasiu Prezidensial nian transforma ba fatin enkontru ida entre desportu, kultura, ambiente, inovasaun no kriatividade. Ida nee mak lo-loos espíritu husi edisaun ba dala 10 Maratona Internasional Dili nian, DIM EXPO no semana matak (Verde) atu hatudu katak kuidadu ita nia ai laran sira, proteje ita-nia animal fuik sira no prezerva ita nia rai signifika mos kuidadu ita nia povu nia saude, moris diak no futuru. Nee maka ita haree lolos ohin iha nee,” dehan Prezidente Republika Ramos Horta.
Prezidente Republika hatete, DIM EXPO hatudu katak nasaun ida nia dezenvolvimentu la depende deit ba investimentu boot ka infraestrutura. Ida nee mos depende ba sidadaun sira-nia kriatividade, espíritu voluntariadu, inovasaun, konesimentu no kapasidade atu serbisu hamutuk ba benefísiu objetivu komun ida nian.
Kada kompetisaun desportiva, espozisaun, projetu komunitariu, inisiativa ambiental no atividade kultural neebe aprezenta iha nee hatudu katak Timor Leste posui talentu, enerjia no kapasidade atu kria oportunidade foun.
PR Horta dehan, semana matak hatoo mensajen simples maibe klean “Love our forests and wildlife” “Hadomi ita nia ai laran no animal fuik sira. Lema ida nee fo hanoin ba ema katak proteje ambiente laos deit responsabilidade Estadu nian. Ida nee ema hotu nia responsabilidade.
“Proteje ita nia ai laran sira, konserva ita-nia biodiversidade, hamenus poluisaun, prezerva ita-nia tasi sira no promove estilu moris saudavel sira mak investimentu sira iha futuru ba ita nia oan sira no jerasaun sira tuirmai,” katak Horta.
PR dehan, DIM EXPO fo vizibilidade ba serbisu neebe halao husi instituisaun publika sira, organizasaun sosiedade sivíl sira, empreza sira, universidade sira, parseiru internasional sira no emprezariu foinsae sira neebe kontribui loron-loron ba Timor Leste ida neebe sustentavel liu, preparadu diak liu ba dezafiu sira sekulu XXI nian.
Maratona Internasional Dili nian edisaun ba dala 10 ida nee mos hatudu Timor-Leste nia papel neebe buras nuudar pontu enkontru rejional. Hodi simu atleta sira, parseiru sira no vizitante sira husi país oioin, inklui rejiaun ASEAN no parte sira seluk iha mundu.
“Ami hatudu ami nia abilidade atu organiza eventu internasional sira neebe promove desportu, turizmu, kooperasaun, no amizade entre povu sira. Hau hakarak hatoo saudasaun espesial tebes ba ita nia bainaka onra, Kampean Olímpika Rosa Mota, neebe nia prezensa iha Timor Leste sai hanesan inspirasaun boot ida ba ita-nia atleta foinsae sira. Permite hau mos atu espresa hau nia agradesimentu klean ba Association of International Marathons and Distance Races (AIMS), ba ninia lideransa global iha promosaun exelensia, integridade no dezenvolvimentu korrida distansia dook iha mundu tomak. AIMS nia serbisu kontribui ona ba hasae padraun maratona internasional no inspira komunidade sira iha kontinente hotu-hotu liuhusi valor universal sira desportu nian. Hau mos hatoo hau nia apresiasaun ba Asian Athletics Federation ba ninia papel importante iha dezenvolvimentu atletizmu iha kontinente aziatiku, ba ninia apoiu ba atleta sira no tanba promove kooperasaun desportiva entre nasaun sira iha ita-nia rejiaun,” katak PR.
Xefe Estadu hatete, Komunidade atletika internasional nia partisipasaun neebe buras hatudu katak Maratona Internasional Díli estabelese aan laos deit nuudar kompetisaun desportiva, maibe mos nuudar plataforma ba amizade, interkambiu kultural no kooperasaun rejional.
Edisaun ba dala10 husi Dili International Marathon, husi DIM EXPO no semana matak so sai posivel tanba kompromisu, jenerozidade no espíritu kooperasaun husi país belun barak, autoridade, instituisaun no parseiru sira neebe fiar iha vizaun ida nee.
Iha biban nee Prezidente Republika mos hatoo agradesementu ba Governu no doador, Patrosinador, sira neebe apoiu eventu Dili Internasional Maratona nee sai posivel.
Eventu abertura DIM Partisipa husi Primeiru Ministru Kay Rala Xanana Gusmão, Francisco Kalbuadi Lay, Vise-Primeiru-Ministru no Ministru Koordenador ba Asuntu Ekonomiku no Ministru Turizmu no Ambiente, Tomas do Rosario Cabral, Ministru Administrasaun Estatal (MAE), Nelyo Isaac Sarmento, Ministru Juventude, Desportu, Arte no Kultura. Nomos Distintu konvidadu sira, Parseiru nasional no internasional sira, reprezentante sira husi instituisaun sira neebe partisipa, Patrosinador, Voluntariu sira, atleta sira.
(eme)
