BAUKAU, STLTIMORLESTE.com – Prezidente Autoridade Munisipiu (PAM) Baukau, Veneranda Lemos hamutuk ho Embaixadora Portugal iha Timor Leste, Maria Manuela F. Bairos abertura jogu trandisional futu manu hodi selebra loron fundasaun Baukau ba dala 166.
Prezidente Autoridade Munisipiu Baukau, Veneranda Lemos esplika, jogu futu manu iha dezde tempu beiala sira nian, nunee liu husi komisaun organizadora ba eventu loron fundasaun Baukau deside hodi implementa hikas iha ambitu selebra loron fundasaun Baukau ba dala 166 inklui ho jogu seluk neebe implementa ona nomos atividade ba estudante sira iha selebrasaun eventu refere.
“Hau hanoin katak jogu ida nee, jogu interesante tebes ba ita nia maluk sira husi liur mos atu hatene, tanba nee hau bolu Embaixadora Portugal mai partisipa abertura jogu trandisional nee,” hateten Veneranda ba jornalista sira hafoin abertura jogu trandisional futu manu iha Vila Nova, Kinta nee (09/04/2025).
Tuir Veneranda, jogu trandisional futu manu interesante tebes, tanba nee prezerva no promove ba ema estranjeiru sira liu husi Embaixadora Portugal, tanba ema estranjeiru la hatene jogu trandisional futu manu orijen husi Timor.
Prezidente Autoridade Munisipiu Baukau nee katak, jogu trandisional futu manu, jogu ba ema hotu, tanba hakarak atu selebrasaun eventu loron fundasaun Baukau lao diak liu tan, tanba baukau oan barak gosta futu manu, nunee komisaun organizadora ba eventu loron fundasaun Baukau hakarak promove futu manu, tanba jogu trandisional hanesan futu manu, governu fo autorizasaun atu halo hodi promove.
“Jogu nee hahu too dia 26 Abril, tanba nee konvida maluk Baukau oan neebe gosta futu manu bele mai joga iha nee,” Veneranda konvida.
Nia hatutan, fatin jogu trandisional futu manu realiza iha resintu Administrasaun Munisipiu Baukau besik edifisiu STAE nian sorin, neebe iha loron 09 Abril parte loraik aberta ona ba publiku, tanba nee husu Baukau oan no maluk husi Munisipiu seluk neebe iha interese bele partisipa iha jogu refere, maibe selu taxa ba ekipa juri husi Autoridade Munisipiu Baukau.
Tanba nee, Autoridade Munisipiu Baukau husu komunidade neebe partisipa iha jogu refere, nafatin mantein pas no estabilidade hodi lori dezenvolvimentu ba oin.
Partisipa jogu trandisional futu manu husi Postu Administrativu Venilale, Crisosem Correira hateten, jogu trandisional futu manu inisiu kedas husi beala sira no rekonhese nuudar konstume tradisional identiku Timor nian, tanba nee importante prezerva.
“Jogu nee laos foin hahu, nanis kedas husi ita nia beiala sira nian, jogu tradisional nee uzu no kostume orijen,” hateten Crisosem.
Nia katak, iha tempu beiala sira bainhira realiza serimonia kultura no serimonia importante seluk sempre iha jogu futu manu, tanba hakarak diverte liu tan serimonia sira, maibe taru osan.
Crisosem argumenta, mezmu jogu futu manu taru osan, maibe iha vantajen ba mane sira, tanba bele kria divertimentu, maibe iha hamosu dezvantajen, tanba jogu iha manan no lakon hamosu impaktu negativu ba rendimentu ekonomia.
Entretantu jogu trandisional futu manu neebe Autoridade Munisipiu Baukau liu husi komisaun organizadora inisia hodi aberta ba publiku, hatan partisipasaun husi komunidade jogu futu manu iha Postu Administrativu Ualu iha Baukau.
(tom)
