ERMERA, STLTIMORLESTE.com — Prezidente Autoridade Munisipál (PAM) Ermera husu Ministériu Obras Públikas (MOP) atu kansela kontratu projetu lima ne’ebé abandona husi kompania no halo retenderizasaun.
Prezidente Autoridade Munisipál (PAM) Ermera, José Martinho dos Santos Soares hatete, pedidu ne’e hato’o ona ba Ministériu Obras Públikas (MOP).
Tuir nia, husi inísiu 2026 to’o Agostu, PAM simu lamentasaun komunidade kona-ba projetu infraestrutura ne’ebé abandona husi kompania.
“Komunidade hato’o lamentasaun barak, no ami husu ba MOP atu kansela kontratu sira ne’e,” dehan José Martinho ba jornalista sira, Kinta (24/09/2026).
Nia hatete, iha Hatulia B iha projetu ida ka rua ne’ebé hasoru problema, inklui projetu estrada iha Atsabe ne’ebé abandona.
José Martinho hatete, kontratu sira ne’e halo diretamente entre MOP no kompania iha nível nasionál, la’ós ho PAM.
Tanba ne’e, PAM la iha autoridade atu kansela kontratu, maibé bele hato’o pedidu ba MOP bazeia ba lamentasaun komunidade.
“Konaba hau nia parte, kansela la iha. Ami rona komunidade no husu ba MOP atu kansela tiha,” dehan nia.
PAM husu MOP atu hapara kontratu, se kompania la ezekuta projetu tuir oráriu no kondisaun ne’ebé estipula iha kontratu.
Nia mos rekomenda MOP halo retenderizasaun atu hili kompania seluk ne’ebé iha kapasidade no vontade atu kontinua no finaliza projetu.
José Martinho hatete MOP fó ona resposta verbal kona-ba pedidu, maibé resposta eskrita seidauk simu husi PAM.
“Resposta verbal iha ona. MOP dehan tenke hapara, maibé resposta eskrita seidauk iha,” dehan nia.
Tuir PAM, iha projetu lima ne’ebé konsidera presiza kansela tanba abandona ona, inklui konstrusaun estrada no bee-mós.
PAM hatete, kompania sira fó razaun kona-ba difikuldade terreno no tempu udan, ne’ebé halo transportasaun material ba fatin projetu sai difísil.
Maibé, tuir José Martinho katak, obstákulu sira ne’e la bele justifika abandonu projetu liu períodu ne’ebé estipula iha kontratu.
Nia husu MOP atu halo asaun ba kompania ne’ebé abandona projetu no buka kompania seluk atu kontinua servisu.
Iha sorin seluk, Xefe Suku Humboe, Francisco Magno Salsinha hato’o preokupasaun kona-ba kondisaun infraestrutura iha Munisípiu Ermera.
Nia husu kompania sira ne’ebé hala’o konstrusaun estrada atu aselera servisu no kumpri kontratu ne’ebé asina.
“Husu kompania ne’ebé halo konstrusaun estrada iha Ermera tenke aselera tuir kontratu,” dehan Francisco.
Francisco hatete, estrada sira presiza aselera tanba Munisípiu Ermera tama ona tempu udan, ne’ebé aumenta preocupasaun populasaun.
Nia mos husu autoridade relevante atu kontinua monitoriza projetu sira ne’ebé seidauk remata, inklui servisu asfaltajen tuir nesesidade.
(ter)
