BAUKAU, STLTIMORLESTE.com – Prezidente Autoridade Munisipiu (PAM) Vikeke, Francisco C. S. de Gonzaga Soares la aseita motorista transporte publiku hanesan bus diresaun Vikeke-Dili atu manipula tarefas pasajeiru.
“Hau atu dehan deit nunee, se karik tarefas nee sira manipula ga mosu monopoli tarefas ita sei la aseita, maibe hau sei koalia ho DNTT para konfirma issu ida nee,” Deklarasaun nee PAM Vikeke, Francisco C. S. de Gonzaga Soares hatoo ba STL liu husi telefone, Kinta (09/04/2026).
Relasiona preokupasaun motorista sira husi transporte publiku bus diresaun Vikeke-Dili neebe hakarak aplika tarefas ba kada pasajeiru husi US$ 8.00 ba fali US$ 10.00 no tanba razaun folin kombustivel sae no bainhira la aseita sei hapara movimentasaun.
Asuntu nee Francisco konsidera nee hanesan foin faze informasaun deit husi motorista sira, maibe Autoridade Munisipal sei koordena ho Diresaun Munisipal Transporte no Komunikasaun (DMTK) Vikeke hodi haree kestaun refere, tanba DMTK mak nain ba tarefas pasajeiru.
“Hau atu konsulta kedas ona parte Autoridade Transporte para ita haree took se sae sira aprezenta razaun balu nunee la prejudika ita nia komunidade neebe mak asesu transporte publiku hanesan bus viajem ba Dili,” katak PAM Vikeke.
Enkuantu relasiona transporte publiku bus diresaun Vikeke-Dili neebe viral iha media sosial katak paradu, Francisco konsidera nee la loos, tanba movimentu ema hotu transporte publiku bus diresaun husi Vikeke ba Dili no Dili Vikeke kontinua lao normal hanesan baibain.
(tom)
