DILI, STLTIMORLESTE.com – Atu selebra Festa Santo Antonio neebe monu iha loron 13 Junhu tinan nee, sarani Parokia Santo Antonio Lakluta realiza atividade oin-oin animasaun Sakramentu inklui atividade seluk.
“Tinan-tinan sempre selebra Festa Santo Antonio mahein Parokia Lakluta, tanba nee ami nia Festeza Santo Antonio nian, preparasaun sarani sira konfesoes simu sakramentu batizmu, primeira komunhaun, krizma no kazamentu, reza novena, animasaun iha tempu kalan neebe aprezenta husi labarik sira husi grupu bairu idak-idak nomos poezia,” hatete Amu Paroku Santo Antonio Lakluta, Pe. Abel Soares Alves ba jornalista STL liu husi telefone iha Lakluta, Kinta nee (05/06/2025).
Pe. Abel informa, iha loron 11 Junhu 2025, labarik sira simu sakramentu batizmu, primeira komuhnaun no krizma no sakramentu kaben iha loron 12 Junhu no iha loron 13 Junhu selebra misa Festa Padrueiru Santo Antonio nomos selebra aniversariu Parokia ba dala XI, misa nee sei prezide husi Dom Leandro Maria Alves.
“Ami hatun estatua Santo Antonio nunee grupu kategorias husi bairu idak-idak ita halo novena reza tersu hahu iha loron 1-12 Junhu iha Igreja, tanba estatua Santo Antonio la sai, maibe sarani sira mai halo orasaun troka malu tuir grupu bairu idak-idak nian, tanba tinan 4 dala ida estatua sai vizita konselhu pastoral sira,” hatete Pe. Abel.
Pe. Abel hatete, tuir kultura Lakluta nia, atividade seluk mak wainhira hatun estatua ho misa hotu hahu tersu no novena depois misa hotu hasai bandeira 3, bandeira Vatikanu, TL no bandeira reinu Lakluta nia, hasae nee orador sira grupu hotu hola parte, hasae bandeira hotu grupu morador sira neebe toma konta morador sira hela metin hodi hein Festa Santo Antonio hotu.
(joa)
