OECUSSE, STLTIMORLESTE.com — Paróku Pássabe promove misa rekonsiliasaun iha fronteira, hodi hametin amizade no dame entre komunidade rai rua nian.
Padre Paróku Pássabe, Agostu Hermenegildo Nunes, konfirma atividade ne’e durante Mídia Tour UPJTL iha ETV São João Paulo II Pássabe.
Nia hateten, igreja iha papél importante hodi promove rekonsiliasaun entre komunidade fronteira Pássabe, Haumeni-Ana no Oé-Olo.
“Igreja nia papél mós halo rekonsiliasaun ba sarani sira, liuliu ami iha liña fronteira entre Pássabe, Haumeni-Ana no Oé-Olo,” hatete Padre Agostu ba jornalista sira, kuarta (07/10/2026).
Nia esplika, inisiativa misa rekonsiliasaun ne’e koordena ho Paróku Oé-Olo, TNI, UPF, servisu migrasaun no alfándega Indonézia.
Koordenasaun ne’e hala’o tanba komunidade fronteira iha kultura no atividade merkadu ne’ebé besik malu, hodi promove dame no unidade.
Padre Agostu hateten, misa rekonsiliasaun realiza ona dala rua iha fronteira, ho partisipasaun sarani husi nasaun rua.
“Fronteira nasaun ita nafatin respeita, maibé amizade entre umanu tenki la’o nafatin,” nia esplika.
Nia informa, misa rekonsiliasaun ne’e ajuda muda situasaun fronteira ne’ebé uluk iha konflitu no desentendimentu entre komunidade.
Agora, komunidade fronteira sai konsiénte atu promove domin no dame, hodi kontribui ba dezenvolvimentu nasaun ida-idak.
Iha fatin seluk, Xefe Suku Abani, Carlos Elo, konfirma misa rekonsiliasaun ajuda hametin dame iha fronteira Pássabe no Haumeni-Ana.
“Agora situasaun hakmatek, haree malu liu husi amizade no laiha ona odiu hanesan uluk,” nia deklara.
Nia afirma, Igreja hahú hala’o misa iha fronteira durante tempu Paskua no Natal, hodi aproxima komunidade rai rua nian.
(jen)
