AMBENO, STLTIMORLESTE.com – Parseiru Ekonomia Hongkong vizita Oecusse, hamutuk ho Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu ho Diretor Diresaun Servisu Rejional Edukasaun, Vincencio Cono, oferese livru ba Eskola Bazika Filial (EBF) Makelab, neebe apoiu direitamente husi Governu Hongkong ba estudante sira iha Oecusse.
Parseiru ekonomia Hongkong vizita Oecusse ho aviaun jet Privadu VP-COP, tuun iha Aeroportu Internasional Rota do Sandalow Oecusse, simu ho dansa kultura Oecusse, tara tais no haleo Oecusse, hasoru malu ho Prezidente Autoridade RAEOA ho estrutura iha Gabinete Autoridade Oebau-Oecusse, nunee iha meudia distribui ekipamentus ba estudante oan sira iha EBF Makelab no lokraik nee, Parseiru Ekonomia Hongkong fila kedan ba Dili ho Jet Privadu.
Tuir Prezidente Autoridade RAEOA, Regio da Cruz Salu dehan, Bainaka parseru ekonomia husi Hongkong Vizita Timor Leste (TL), tanba nee Primeiru Ministru (PM), Kay Rala Xanana Gusmao haruka sira mai Oecusse hodi haree Oecusse hanesan Zona Ekonomia ida no Oecusse hanesan fatin potensial ida ba rai doben TL.
“Ita iha obrigasaun atu simu, tanba ida nee bainaka governu nian pas parte parseirus ekonomikus, sira nia obrigasaun Corporation Sosiu Responsibility (CSR), sira ajuda uitoan ita nia estudante oan sira iha Oecusse liu-liu iha Makelab, oferese pasta, bola, kadernu, lapis no seluk-seluk tan. Ita iha RAEOA mos iha politika kona ba Sosial Corporation Responsibility planning, ita adopt aba iha RAEOA, iha loron ida iha Zona ekonomia nee, ita nia parseiru ekonomia sira pas parte parseiru Governu nian, sira mos iha obrigasaun kona ba CSR, ezemplu iha Oecusse durante nee, kuandu iha eventu ruma iha area desportivu ka eventu nasional ruma, ita haree sira nia spanduk ou banner, tau logo kompanhia sira nian, ida nee parte apoiu CSR. Ohin mos ita nia parseiru husi Hongkong, Cienjie Hongkong, ohin oferese apoiu iha Oecusse no grupo soru tais husi Poasbola Makelab sira nia produtu, sira sosa borong hotu,” dehan PA-RAEOA, Regio da Cruz Salu ba STL iha Oecusse, Sesta (5/6/2026).
Nia haktuir tan katak, liu husi sira nia vizita nee, governu autoridade oferese informasaun ruma neebe sira presiza ba nesesidade saida maka sira presiza hodi halo analiza, ba posibilidade potensialidade merkadu TL liu-liu iha RAEOA.
“Pozitivu, ita sei kontinua diskuti teknikamente atu haree sira nia interese ba saida, tanba nee ekipa ida husi RAEOA sei akompanha, bainhira sira hatama sira nia aprezentasaun kompletu atu investe iha setor saida, ekipa sei halo avaliasaun ida atu haree dilijensia balun ke presiza kompriende, maibe Oecusse laos nasaun ketak, tanba nee governu sentral dedika sira mai Oecusse, ida nee pas parte planu investimentu ekonomia nasional, ita hotu hotu pasparte singkronizasaun ba investimenu nasional nee bele lao, tanba sira hakarak investe iha setor turizmu, Comersiu, haree mos kona ba enerjia matak nomos asuntu formasaun, dezenvolvimentu capital professional liga ba teknolojia no industria, tanba nee nuudar uma nain nakloke ba ita nia belun sira neebe mai vizita, ita simu,” haktuir PA-RAEOA.
Iha biban nee, Deng Xhuo Qi, husi kompanhia Chairman of Brilliant International Holdings Limited liu husi ninia deskursu dehan ondra tebes hamutuk ho povu RAEOA hatudu katak Oecusse hanesan istoria ba TL.
“Hau hateten katak, Oecusse hanesan fatin istoriku ba TL, tanba nee maka ami mai iha TL, atu explora no halo investimentu iha nasaun TL, tanba nee ami nia amizade diak ho TL hahu ohin iha Oecusse no futuru nasaun TL hahu husi estudante oan sira. Ami sei investe iha rekursu naturais liu-liu Mineral, tanba nee hau atu hateten ba ita boot sira katak, rekursu naturais laos deit osan mean deit, laos mina deit, maibe rekursu importante iha nasaun ida nee maka estudante oan sira neebe sei eskola hela nee, ita boot sira maka futuru ba TL,” dehan nia.
Nia haktuir tan katak, liu husi edukasaun loron ruma bele sai mestre, engineering, Dotor, bele sai bisnis professional ida iha futuru, tanba nee saida maka estudante oan sira aprende iha eskola nee, sei lori nasaun nee ba oin.
“Ami mai iha nee, tanba hadomi ita boot sira no iha momentum ida nee maka ita hahu ita nia amizade no ita sei hakat ba oin nafatin,” haktuir Deng Xhuo Qi.
Tuir observasaun STL iha serimonia entrega ekipamentus eskola ba estudante sira, katuas lia nain sira simu parseiru ekonomia husi Hongkong, akompanhia husi PA-RAEOA, ho lia dadoli (Takanab) husi katuas lia nain sira, bidu no tara tais no estudante oan sira simu bainaka sira nee ho alergria no kontente.
(jos)
