DILI, STLTIMORLESTE.com – Daudaun parteira iha Sentru Saude Bobonaro (SSB) la sufisente atu fo atendimentu ba inan isin rua sira, tanba parteira ida deit mak fo atendimentu ba inan sira neebe partus.
Nia dehan, agora iha ona enfermeiru kontratu, maibe laiha mediku no parteira nain ida mak fo atendimentu ba inan isin rua sira neebe mai partus iha Sentru Saude Bobonaro.
“Parteira hau mesak, tanba nee banhira hau atende pasiente iha hau nia fatin, depois pasiente balun bolu fali iha fatin seluk, entaun Postu Saude nee husik mamuk, entaun pasiente neebe iha postu saude labele atende tanba kolega infermeira labele atende inan isin rua tanba nia knaar laos parteira,” hatete Parteira iha Sentru Saude Bobonaro, Agustina Pires ba STL kiha CITY8, Kinta (21/05/2026).
Nia esplika, ba inan neebe hela iha area remotas, labele ba hanesan iha neeba aldeia rua mak hela iha mota sorin, parteira labele too iha neeba, tanba hakat liu ba mota sorin.
“Ida nee hau labele asesu entaun hau kolabora ho autoridade lokal sira atu kateu inan isin rua ba postu saude atu bele partu, maibe bainhira autoridade sira la konsege kateu inan isin rua ba postu, entaun hau buka maneira oinsa bele atende inan isin rua iha nia fatin,” nia deklara.
Antes nee Vise Ministru ba Fortalesimentu Institusionál Saúde (VMFIS), José dos Reis Magno esplika, parteira sira mak sai hanesan pilar importante ida iha prestasaun servisu saúde primária no iha papel decisivu atu hamenus mortalidade inan no labarik, liu-liu iha área rural no komunidade remota sira.
Nia deklara, Timor Leste kontinua hasoru dezafiu importante sira iha setor saude. Tuir dadus demográfiku nasional, populasaun Timor-Leste liu ona millaun 1.3 iha tinan 2022, ho kresimentu populasaun anual 1.9% ka ema 25,000 aumenta kada tinan. Kresimentu ida nee fo presaun boot ba Sistema Nasional Saúde, tanba aumenta nesesidade ba servisu saude inan, neonatal, infantil no saúde reprodutiva.
Governante nee informa, iha tempu hanesan, nasaun ida nee mos kontinua hasoru dezafiu estrutural sira relasiona ho kualidade no kobertura servisu saude, liu-liu iha area rural no fatin difisil asesu, neebe falta profisionál kualifikadu sira, infraestrutura la sufisiente no ekipamentu saude neebe limitadu, neebe afeta prestasaun servisu essensiál sira.
(jen)
